Partia Socialiste reagoi pas deklaratave të opozitës dhe të aleatit të saj, LSI, që kërkojnë zgjidhjen e krizës. Në një sqarim të gjatë opozita fajësonte Partinë Socialiste se nuk po pranon paketën e propozuar nga SHBA dhe BE.
Duket se PS i mbetet datës së zgjedhjeve më 18 qershor.
“Partia Socialiste shpreh keqardhjen për abuzimet mediatike të të ashtuquajturit koalicion opozitar, me një proces shume serioz dhe delikat përpjekjesh për t’a kthyer Partinë Demokratike në rrugën e arsyes.
Angazhimi në këto përpjekje edhe i partnerëve strategjike amerikanë, pas ezaurimit të të gjitha përpjekjeve të miqve e partnerëve europianë të Shqiperise (dhe të vetë Partisë Demokratike), është mirepritur dhe konsiderohet prej nesh si mundësia e fundit për Partinëe Demokratike për të hequr dorë nga shantazhet e rrugës dhe për t’u kthyer në rrugën e garës demokratike.
Partia Socialiste e mbështet fuqimisht këtë përpjekje të fundit dhe do të presë me durim, duke shpresuar deri në sekondën e rënies së gongut të fushatës zyrtare, për një rezultat pozitiv në funksion të përfshirjes së PD-se në zgjedhje. Për Partinë Socialiste, rezultat pozitiv do të thotë garanci si asnjëherë për opozitën në zgjedhjet e 18 qershorit, në respekt të Kushtetutës, ligjit, interesit të qytetarëve shqiptare dhe sugjerimeve dashamirëse të partnerëve tanë ndërkombëtare.
Filozofia e Partisë Socialiste, e mishëruar në programin e në betejen e përditshme të qeverisë sonë për të bërë shtet, nuk përjashton askënd dhe për asnjë arsye. Rregullat e bashkëjetesës demokratike, nuk vlejnë vetëm për qytetarët po edhe për partitë politike. Asnjë parti politike dhe as të gjitha partitë politike së bashku, nuk mund të pretendojnë as të dalin mbi këto rregulla, e as të bëjnë pazare me këto rregulla. Përkundrazi, Partia Socialiste beson, se duhet të jetë forca e shembullit në përpjekjen për të bërë shtet dhe jo shembulli i forcës që thyen rregullat që asnjë qytetari nuk i lejohet të thyejë.
Shqiperia Europiane për Partine Socialiste nuk është sllogan, po nje shtet dinjitoz, ku askush nuk është mbi Kushtetuten dhe ligjin,” thuhet në deklaratë.
Ndërkohë gjatë ditës së sotme kryeministri Rama është shfaqur në prani të kryebashkiakut Veliajt, duke shërbyer ushqim për fëmijët e një kopshti në Kombinat./tesheshi.com
