Në mbledhjen e grupit parlamentar socialist, kryeministri Edi Rama duke iu drejtuar deputetëve të PS-së tha se nuk do të pranohet asnjë ndërhyrje e tyre për të kryer emërime në nivel teknikësh në administratën e shtetit.
Ky udhëzim duket se çliron drejtuesit e instituciuoneve, përfshi edhe ministrat, nga kërkesat që vijnë nga deputetët për punësime të të afërmve, mbështetësve apo elektoratit të tyre në administratën publike.
Por në anën tjetër raportohet se krahas kërkesës drejtuar ligjvënësve socialistë, me emërimet apo punësimet në administratë, do të merret një grup pune, që do të luajë rolin koordiunues mes strukturave të bazës dhe institucioneve.
Raportohet se në këtë grup bëjnë pjesë Evis Kushi, Vilma Bello dhe Blerina Gjylameti, të cilat duket se do të kenë në dorë emërimet në administratë, ose propozimet e kandidaturave për vendet e punës.
Nuk dihet nëse këto propozime do të bëhen vetëm për ato që konsiderohen poste politike, apo do të përfshijnë edhe ato teknike.
Në 4 vitet e mandatit të parë qeverisës një nga ankesat e vazhdueshme që depozitoheshin nga drejtuesit e PS në rrethe kishte të bënte me punësimet në administratë. Tashmë duket se hapësirat që do të krijohen janë më të mëdha, kjo për faktin se PS nuk ka arsye të ndajë pushtetin dhe vendet e punës me asnjë forcë tjetër politike. Të presim dhe të shohim, ndoshta nga shtatori e tutje socialistëve mund t´I buzëqeshë fati dhe të bëhen pjesë e administratës. /tesheshi.com/
