Partia Socialiste ka gati emrin e kandidatit për Bashkinë e Tiranës, emër që ndoshta do të mësohet brenda pak orëve.
Të paktën këtë la të kuptohet kryetari i Lëvizjes Socialiste për Integrim, Ilir Meta. “Emri i kandidatit për Bashkinë e Tiranës është gjithpërfshirës”, tha ai pas daljes nga selia e Partisë Socialiste ku është zyrtarizuar marrëveshja e rënë dakort kohë më parë mes dy palëve për daljen në zgjedhjet e 21 Qershorit.
Pjesë e kësaj marrëveshjeje, që do t’i dorëzohet Komisionit Qendror të Zgjedhjeve si “Aleanca për Shqipërinë Europiane” pritet të jenë në total rreth 40 parti. Mes tyre është edhe PSV ‘91 e Petro Koçit.
“Firmosëm marrëveshjen e koalicionit që do t’i dorëzohet KQZ-së. Në koalicion do të jenë rreth 40 parti”, deklaroi vetë Koçi pas daljes nga selia e PS-së. /tesheshi.com/
