Ilir Beqja, ministri i Shëndetësisë ka nisur prej dy javësh një fushatë masive pushimesh nga puna të pastrueseve dhe punonjësve të prapavijës si kaldaistë, hidraulikë, bojaxhinj e mekanikë, në të gjithë spitalet e Shqipërisë.
Sipas burimeve nga dikasteri “Beqja”, bëhet fjalë për rreth një mijë vetë.
I gjithë ky kontigjent është futur në punë pas vitit 2011 e deri në 2013-ën, kohë kur Lëvizja Socialiste për Integrim mbante dikasterin e Shëndetësisë, e që qeveriste me Berishën.
Në të gjithë këto emërime ka pasur një kriter zero: vetëm fut e ngjesh. Absurdi ka shkuar deri aty ku me spitalet me 100 shtretër janë emëruar rreth 100 pastruese; pra nga një pastruese për shtrat; por që përsëri pisllëku përsëri të mbyste, derisa janë futur në punë për rrogë e jo për ta bërë punën.
Pra, shumica e emërimeve janë bërë thjesht për një pagë dhe me përllogaritjen e (ç)natyrshme për të siguruar vota nga familjet që i punësohej një anëtar. Dhe llogaritet që kjo skemë, tipike prodhim “Made in LSI”, të ketë prodhuar më shumë se 5 mijë vota në të gjithë vendin. Sigurisht për të, partinë flamurtare të integrimeve europiane.
Por vendimi i ministrit Ilir Beqja, i cili është marrë natyrisht pas konsultimeve me kreun e qeverisë, ka shkaktuar një përplasje shumë të fortë mes aleatëve në koalicion.
Mësohet në rrugë kofidenciale se ka qenë vetë Ilir Meta i cili i ka telefonuar të “gjatit” të Shëndetësisë, ku mes të dyve ka pasur një debat të fortë.
Kjo situatë ka rifutur në krizë partnerët e koalicionit qeveritar, ku prej dy javësh Ilir Meta dhe Edi Rama kanë pasur thatësirë takimesh.
Nga dy herë në javë që takoheshin aleatët,një herë në zyrën e Metës dhe një herë te ish-vila e Mehmet Shehut, riti tashmë është thyer dhe nuk ka asnjë kontakt.
Kryeministri Rama, për herë të fundit u ngjit te zyra e kreut të Kuvendit para 3 javësh.
Ndërkaq, mësohet se ente mediatike publike që drejtohen nga njerëzit e LSI-së, i kanë vendosur një bllokadë qeverisë duke u afruar edhe me Partinë Demokratike.
Këto janë sinjale të qarta se gjërat po lëvizin ndryshe, në një kohë kur këtë të enjte pritet të bëhet publike hyrja në procedura parlamentare e reformës në drejtësi.
Nëse ajo nuk do të miratohet nga Kuvend, atëherë sipas të gjitha gjasave vendi shkon në zgjedhje të parakohshme parlamentare.
Por LSI po shikon edhe variantin e gjetjes së një mazhorance tjetër brenda parlamentit, që të formojë një qeveri ku PS-ja del në opozitë. Dhe në këtë rast do të synohen të merren deputetë nga socialistët.
Jo më kot, në shumë portale ka një muaj që ka dalë si tezë “Meta kryeministër”.
Por t’i referohemi numrave në parlament, PD+LSI bëjnë 64 deputetë dhe i duhen vetëm 7 të tjerë për të pasur qeverinë.
Po a i ka të gjithë deputetët e tij Meta pas vetes?! Vetëm 3 javë më parë kreu i LSI-së akuzou disa parlamentarë të tij se i janë afruar Ramës. Lufta po bëhet gjithnjë e më e ashpër dhe me intriga pallati…
Përgatiti: Ylli Pata – /tesheshi.com/
