Numri 2 i PS-së, Taulant Balla, i ka uruar “punë të mbarë” Këshillit të ri Bashkiak të Shkodrës, i cili u konsituua nën një situatë të tensionuar, për shkak të protestave të PD-së lokale. Demokratët, edhe pas dorëheqjes së Valdrin Pjetrit, rezultuar me “njollë kriminale” nga e kaluara, duke mos e njohur 30 Qershorin, nuk pranojnë që ta dorëzojë drejtimin e qytetit-bastion te socialistët.
Balla i kërkon ndjesë komunitetit shkodran në lidhje me precedentin “Pjetri” dhe e quan të përfunduar punën dhe me qytetin verior, ku tani do i duhet të gjejë një kryetar të përkohshëm, i cili zyrtarisht do jetë n/kryetar i dalë nga Këshilli i ri Bashkiak.
“’Sot shkodranët kanë ‘kuvendin’ e tyre të ri lokal, të përbërë nga 51 këshilltarë bashkiakë të zgjedhur në Zgjedhjet Vendore të 30 Qershorit. Duke i uruar Këshillit të ri bashkiak urime në punën e tij shumë të rëndësishme, Partia Socialiste i shpreh ndjesë komunitetit te nderuar të Bashkisë së Shkodrës per situatën e krijuar pas dorëheqjes së detyrueshme të Kryetarit të zgjedhur të Bashkisë, por si në çdo rast në qëndruam përtej çdo interesi partiak, politik apo individual, vetëm në anën e ligjit dhe të interesit publik.
Si në çdo rast, kur mes palëve politike përfshihen institucionet ligjzbatuese dhe kur bëhet fjalë për raportin e individit me ligjin, Partia Socaliste nuk investohet në asnjë debat. Ligji është i barabartë për të gjithë dhe ai vetëm duhet zbatuar nga kushdo.
Në lidhje me kompetencën e Këshillit Bashkiak në raport me Kryetarin e Bashkiksë, në mbledhjen e parë të Këshillit Bashkiak u konstatua fakti i mosparaqitjes së fituesit si Kryetar Bashkie Shkodër në zgjedhjet e datës 30 qershor 2019, Z. Valdrin Pjetri për të bërë betimin në përputhje me ligjin.
Sa më sipër, institucionet e ngarkuara nga Kushtetuta dhe ligji duhet të marrin përgjegjësitë që ju takojnë në situatën e krijuar”, shkruan Balla në një postim të fundit. /tesheshi.com/
