PS ka çuar në Kushtetuese rastin “Kapllanaj”, me qëllim heqjen e mandatit të kreut të Bashkisë së Mallakastrës, Agron Kapllanaj, për shkak të një dënimi në të kaluarën. Ky hap i tyre vjen pas vendimit të KQZ-së për të kundërtën, por që socialistët nuk e pranojnë, gjithnjë duke iu referuar rastit “Roshi” të Kavajës.
“Në emër të 49 deputetëve të mazhorancës, sapo kemi depozituar në Gjykatën Kushtetuese kërkesën për konstatimin e pavlefshmërinë për përfundimin e mandatit të Kapllanajt”, tha deputetja socialiste, Klotilda Ferhati, duke vijuar më pas të akuzojë kreun demokrat Basha, si veprues me dy standarte
“Për të gjithë është e qartë pse Basha sillet si polic e prokuror, se nuk e bën dot detyrën e kretarit të PD. Kapllanaj është dënuar me 2 vjet heqje lirie dhe 200 euro gjobë për vjedhje. Por Basha s’jep përgjigje dhe s’mban përgjegjësi. Basha flet 10 herë në ditë për të tjerët, për krimin e të inkriminuarit, por ka 3 ditë që nuk flet për të dënuarin për vjedhje, të cilin Basha e mbrojti duke shkel ligjin në KQZ. Vendimi KQZ jo vetëm është i paligjshëm në përmbajtje dhe arsyetim i servirur nga opozita, por edhe për shkak të shkeljes së afatit të shqyrtimit. Klement Zguri me dashje dhe nën presion politik opozitar nuk respektoi detyrimin ligjor për ta shqyrtuar brenda 10 ditëve sipas ligjit të dekriminalizimit”, tha deputetja Ferhati.
Si dhe në rastin “Roshi” për demokratët, edhe “Kapllanaj” përbën një rast të artë për socialistët, për ta ndëshkuar kundërshtarin me (de)kriminalizim. /tesheshi.com/
