Mazhoranca ka vijuar të përdorë kartën e 97-ës si një formë akuze ndaj opozitës, që sipas saj po tenton ta rikthejë atë me anë të aksionit politik të shpallur, sidomos bllokimin e rrugëve. Nga selia e PS-së doli këtë të shtunë një deklaratë ku thuhet se vendi rrezikon të rrëshqasë në 97-ën, si pasojë e kërcënimeve të opozitës.
“Është koha që Basha të mësojë se: Ai që bënte thirrje vetëm pak ditë më parë për të thyer dritaret e për të shpuar gomat, nuk mund të pretendojë krejt papritur e pakujtuar se është thjesht një qingj i pafajshëm. Çadra e Bashës e ka vonuar mjaft tashmë zbatimin e Reformës në Drejtësi dhe rrezikon ta nxjerrë Shqipërinë nga rruga drejt BE-së. Kërcënimet e tij për bllokimin e rrugëve dhe bojkotin e zgjedhjeve janë një rrugë e rrezikshme që na çon pashmangshmërisht vetëm drejt dhunës, pikërisht ashtu si në 1997-n. Ne nuk do ta lejojmë PD-në t’ju marrë peng të ardhmen shqiptarëve. Në 18 qershor, qytetarët do të jenë të lirë të shprehin vullnetin për zgjedhjen e tyre”, thuhet në deklaratën e PS-së.
Por nga ana tjetër Basha ka premtuar me të madhe se protesta, edhe pse me bllokim rrugës, do jetë paqësore. Ndërsa sa për 97-ën, ai iu drejtua Ramës në distancë duke i thënë se autorët e saj janë sot krah tij, dhe me këtë rast përmendi emrin e Gramoz Ruçit. /tesheshi.com/
