Nikollë Lesi, botuesi i “Koha Jonë”, së ka dalë sot me një propozim krejt të paimagjinueshëm për zhvillimet politike në vend. Lesi, një komentator që vitet e fundit ka qenë pranë qëndrimeve politike të LSI-së, hedh idenë e ribashkimit të saj me PS-në.
Po po, të ribashkimit politik për zgjedhjet lokale të vitit 2019. Në terma të tjera ai kërkon rikthimin e “tepsisë”. Sepse Rama të tillë e ka pagëzuar. Sipas Lesit, një “martesë” mes LSI-së dhe PD-së së Lulzim Bashës nuk funksionon dot, ndaj duhet ndryshuar.
“Përsonalisht, po të kisha të drejtë vote në LSI do të votoja pa asnjë hezitim për një koalicion të ri me PS. Fillimisht për në zgjedhjet vendore 2019. Natyrisht me rregulla, këtë rradhë shumë strikte, dhe krejt publike. E jo si 18 maji 2017 i Lulzim Bashës”, shkruan Lesi.
Por a është i mundur një ribashkim mes Partisë Socialiste dhe Lëvizjes Socialiste për Integrim sot, apo është një ide utopike?
Nikollë Lesi ka të drejtë vetëm kur thotë se baza e këtij koalicioni është Bashkia e Tiranës dhe Erion Veliaj. Ky i fundit nuk mund të bëhej kryebashkiak pa aleancën e fortë me LSI-në e Ilir Metës. Por me të njëjtën logjikë as Edi Rama nuk do bëhej kryeministër në 2013-ën.
Madje një gazetë shkruante se ka një pakt që Edi Rama të bëhet president dhe Ilir Meta të rikthehet kryeministër, por ky ngjan me një lëshim fantazie në prag-pranvere.
Sepse pyetja më e thjeshtë: përse duhej të bashkoheshin? Sigurisht që nuk ka asnjë lloj përgjigje.
Ajo çfarë ndodhi këtë pranverë, ku me një lëvizje inteligjente Rama u shkëput nga LSI dhe e çoi në opozitë partinë heroike të Metës, ka ekzistuar si projekt politik para aleancës së 2013-ës. Madje dhe aleanca, ripajtimi, pos si një synim për ardhje në pushtet, ka patur dhe ç’aktivizimin në kohë të një partie-detonatore që të hedh në erë, LSI-së. Këtë fat po ka dhe PDIU, pra dy bombat elektorale të politikës shqiptare, që Rama zgjodhi t’i ç’aktivizojë me kujdes. Dhe në terma politike, ky është triumfi më i madh i tij sa ka jetë politike. Racionalisht, ka pamundësi zero për një rikthim PS-LSI. Së paku në këto kohë. /tesheshi.com/
