Nga Blendi Gashi
Jo veç Mushtishti i Suharekës provokohet nga serbët e larguar nga Kosova 19 vjet më parë, por fat të njëjtë ka edhe fshati Poterq i Klinës.
Një vizitë e paralajmëruar nga një grup serbësh në vendin ku ka qenë kisha para lufte, ka bërë që të shkaktohet kaos me policisë dhe banorëve shqiptarë të hënën paradite. Këta të fundit dolën në rrugët e fshatit për të protestuar kundër vizitës së ish – fqinjëve të tyre, pasi në këtë fshat gjatë luftës u vranë 17 civilë shqiptarë.
Rreth 50 persona vendosën vetura dhe traktorë në skaj të rrugës së këtij fshati me qëllim që të bllokonin qasjen për në kishë.
Por këtë nuk ja arritën, pasi policia arrestoi dhjetëra banorë dhe ja mundësoi serbëve të realizojnë vizitën.
“Kënduan këngë çetnike”
Ismet Jagoda, kryetar i fshatit Poterq ka thënë se serbët po i provokojnë çdo vit.
“Këtë vit kemi vendos mos me i lejuar. I kemi njoftuar policinë që mos me i lejuar, por kanë prapë kanë ardhur. Jemi të vendosur mos me lëshuar pe”, tha ai para se policia të ndërhynte dhe t’ua mundësonte serbëve të mbërrinin tek kisha.
Ndërsa Islam Zeneli, banor i këtij fshati, ka treguar se serbët vitin e kaluar kanë kënduar edhe këngë çetnike në fshatin e tyre.
“Kisha është ndërtuar në masa të dhunshme. Nuk ka pasur kishë kurrë. Vitin e kaluar kanë ardhur 7 apo 8 serbë dhe i kanë rrah 2 policë. Janë zhvesh edhe kanë kënduar këngë çetnike në pike të ditës. Me prekë në gjak edhe me ardhur me na provokuar nuk lejojmë“, ka thënë për mediat kosovare Zeneli për “Koha Ditore”, të cilit i është vrarë djali gjatë luftës.
Reagimi i ministrit…
Ndaj protestës së organizuar ka reaguar Dalibor Jevtiç, zv.kryeministër, njëherit ministër i Komuniteteve në qeverinë “Haradinaj” duke e quajtur një akt të turpshëm i cili nuk sjell ndonjë të mirë për këdo që jeton në Kosovë.
“Kjo është e papranueshme dhe se incidentet e tilla si sot, duhet të marrin fund”, ka thënë ai.
Serbët janë larguar rreth orës 14:00 pasi përfunduan ritualet e tyre.
Gjithashtu edhe banorët që bllokuan rrugën për disa orë janë shpërndarë.
Kujtojmë se Kisha e Trinisë së Shenjtë në Poterq është ndërtuar në vitin 1992 si dhuratë e familjes Kariç Petriq, jo larg nga Klina, në rrugën Pejë – Prishtinë.
Pas ardhjes së forcave italiane të KFOR-it, ajo u shkatërrua në fund të qershorit 1999. /teshesh.com/
