Pas vendimit të autoriteteve të Kosovës për të ndaluar qeveritarët serbë të hyjnë në territorin e Kosovës, Ministri i Punës dhe Çështjeve Sociale ka hyrë në “zëmrën kuqezi” të Kosovës, Drenicë.
Siç bëjnë të ditur mediat serbe, Vulin ka qenë prezent në një fshat të vogël pranë Skënderajt për të kremtuar Pashkët Ortodokse së bashku me një numër të komunitetit serb që jeton aty.
Zyrtari i lartë i Beogradit mori pjesë në liturgjinë e mesnatës në Manastirin e Deviçit, i cili ndodhet afër Skënderajt.
Ai ka theksuar se festa e Pashkëve është një mundësi për të kujtuar Kosovën dhe serbët në Kosovë.
“Serbët në Kosovë janë pjesë e kombit serb dhe për këtë arsye janë pjesa më e dashur e popullit serb. Ende nuk mund të thuhet se serbët këtu po jetojnë në drejtësi dhe në paqe”, tha Vulin.
Ministri i Punës dhe Çështjeve Sociale të Serbisë ka sulmuar qeverinë e Kosovës, kur ka thënë se “midis dy të Pashkëve janë shënuar sulme të shumta ndaj të kthyerve serbë, ku ishte tentuar edhe vrasja e fëmijëve serbë në Gorazhdec”.
Vizita e Vulin në Drenicë është një provokim i pastër, pasi si zona e Drenicës ashtu dhe Skënderaj është zemra e rezistencës për liri e shqiptarëve dhe vendi ku janë kryer masakrat më të tmerrshme dhe më të shumta nga makina serbe e dhunës.
Drenica është edhe vendlindja e heroit legjendar Adem Jasharit dhe familjes së tij martire./tesheshi.com/
