Një shqiponjë përgjysmë, provokim apo blasfemi?
Po debatohet fort në Beograd këto ditë mbi volumin e tretë të Petrit Imamit, kreut të katedrës së dramaturgjisë në Beograd, i cili ka nxjerrë nga arkivat pjesën e tretë të marrëdhënies mes serbëve dhe shqiptarëve. I përkthyer nga Naimja, bashkëshortja, profesoreshë e shqipes në Universitetin e Beogradit, libri po mbështetet nga dy prej aktorëve më të rëndësishëm të shoqërisë civile.
Përpara zgjidhjes finale të Kosovës nga Serbia, në Beograd, Fondacioni Soros dhe botuesi i televizionit B92, Veran Matiç, kanë rihapur diskutimin në shoqërinë serbe për marrëdhëniet me shqiptarët.
Matiç, i shtëpisë botuese Samizdat B92, është botuesi në serbisht edhe i “Kurbani”-t të Edi Ramës. Ai insiston që shqiptarët dhe serbët realisht ose nuk e dinë fare ose e dijnë fare pak marrëdhënien mes tyre. Ndaj siç bën të ditur B92, në Beograd ka nisur një dialog në elitën serbe për të diskutuar mbi atë se cila është e vëreta e raporteve me shqiptarët. Dhe për këtë është zgjedhur një libër i Petrit Imamit, intelektualit shumë të njohur nga Kosova, i cili ka lindur në Prizren por jeton në Beograd.
Imami ka publikuar një studim të thelluar: “Shqiptarët dhe Serbët përgjatë shekujve”. Studimi tregon periudhat kyçe historike që kanë vendosur kthesat e mëdha. Një kopertinë provokative, ku një shqiponjë me dy koka e ndarë në dysh, gjysma e bardhë si në flamurin serb dhe gjysma e zezë si në flamurin shqiptar, ka ngjallur polemika të forta. Ky libër është sulmuar egër nga nacionalistët e të dy palëve. Por në Beograd, pronari i televizionit B92 thekson se ai ka mbështetur shpërndarjen e librit në biblotekat e Serbisë dhe në shkolla. Qëllimi i donacionit është të ndihmojë nxitjen e një dialogu të brendshëm për të informuar mbi marrëdhëniet midis serbëve dhe shqiptarëve.
“Në mënyrë që një dialog i tillë të jetë konstruktiv dhe i përgjegjshëm, është thelbësore që pjesëmarrësit të jenë të informuar mirë, domethënë që ta njohin historinë e tyre”, tha Aleksandra Sanjeviç, kreu i “Soros”-it në Serbi.
Jasmina Ninkov, drejtoresha e Biblotekës së Beogradit, deklaroi se ka mjaft interes nga qarqe akademike dhe shkollore për të njohur librin e Imamit.
Veran Matiç, thekson se libri i Petrit Imamit i ka bërë një rishikim historisë duke hequr propagandën dhe përdorur dokumentacionin e thatë. Matiç shtoi se vetë serbët dhe shqiptarët duhet të mësojnë nga historia duke mos e përsëritur atë. /tesheshi.com/
