Ashtu siç pritej, takimi i Patriarkut rus Kirilli dhe Edi Ramës do të ishte më interesanti ndër takimet politike.
Kjo jo vetëm sepse kryeministri shqiptar është katolik që ka marrëdhënie të mira me Turqinë dhe problematik me Rusinë e Greqinë, por edhe për të parë temperaturën reale që Kremlini mat relacionet me Tiranën.
Edi Rama e ka transmetuar thuajse live takimin e tij me Patriarkun rus në Facebook, duke lëshuar dy mesazhe realisht të forta politike.
Në fjalën e tij, Edi Rama, i cili, në fillim nuk e kurseu kortezinë duke përmendur lidhjen e Kishës Ortodokse të Rusisë me artistët e mëdhënj rusë si Çajkovski, përmendi në sy të Janullatosit, Fan Nolin si Kryepeshkopin e Parë të Kishës Ortodokse Autoqefale Shqiptare, event që nuk njihet zyrtarisht.
Rama tha se “Kisha e Shën Gjergjit në Boston është fillimi i Kishës Ortodokse Shqiptare”, duke i vënë vijë asaj pjesë parardhëse që Patriakana e Stambollit njeh.
Rama tha se Noli u shugurua nga Platoni, peshkopi rus i Nju Jorkut, duke lëshuar realisht një “provokacija” pasi shmang si Kishën greke por edhe Patriakanën, të cilat janë realisht fuqia në Kishën Ortodokse Shqiptare.
Po të shikosh kupolën religjoze në Shqipëri ka këto rezultate: KMSH ka kryetar Skënder Bruçajn, me shtetësi e kombësi shqiptare. Kisha Ortodokse ka kryetar Anastas Janullatos me kombësi greke dhe shtetësi shqiptare të dhënë nga Ilir Meta. Kisha Katolike ka drejtues George Frendo me shtetësi shqiptare të dhënë nga Ilir Meta dhe kombësi malteze. Vëllazëria Evangjeliate Shqiptare ka drejtues Ali Kurtin, me kombësi e shtetësi shqiptare. Kryegjyshata Bektashiane ka drejtues Baba Mondin me shtetësi e kombësi shqiptare.
Në takimin me Ramën, edhe Patriarku rus, Kirilli, është treguar mjaft xhentil: ai ka bërë elozhe pa mbarim ndaj Ramës si artist e kryebashkiak, duke treguar kështu një nivel të lartë diplomatik. /tesheshi.com/
