Zgjedhjet e fundit parlamentare në Shqipëri janë përlyer me vjedhje votash, pavarësisht faktit që ishin zgjedhjet e para të u zhvilluara në një klimë besimi mes palëve.
Disa komisionerë partiakë edhe këtë radhë kanë vendosur “ndërgjegjen politike” para asaj “ligjore” edhe pse Kodi Zgjedhor i ndryshuar me marrëveshjen e 18 Majit parashikon dënime të rrepta me burg për ata që prekin votën.
Ashpërsimi i ligjit nuk ka pasur efekt në “profesionin” e numëruesit të votave. Në disa raste mendohet se ata kanë tjetërsuar vullnetin e votuesve duke kaluar vota nga një parti tek një tjetër.
Disa prova për vjedhje votash gjatë numërimit të tyre nga komisionerët janë bërë tashmë publike dhe pritet vendimi i Komisionit Qendror të Zgjedhjeve dhe më tej i Kolegjit Zgjedhor për të pranuar këto prova.
Janë të paktën dy denoncime të forta të PDIU-së në Tiranë dhe të PD-së në Berat që kërkojnë ndëshkim për komisionerët që akuzohen se kanë prekur votat. Por edhe PS-ja, partia që ka fituar zgjedhjet, ka bërë një kërkesë kundër rezultatit të qarkut Tiranë.
PDIU-së i duhen 38 vota për të arritur pragun prej 3 % që i jep një mandat deputeti në Tiranë dhe për këtë arsye ajo ka marrë në shqyrtim pamjet filmike të numërimit të votave duke pretenduar se votat e saj kalonin në mënyrë të paligjshme tek partitë e tjera.
Mesila Doda, eksponente e lartë e kësaj partie, ka paraqitur prova filmike që tregojnë tjetërsimin e votave.
Në video shihet që njëri prej komisionerëve një fletë votimi, ku ishte votuar për PDIU-në e lë veç dhe më pas e përfshin atë në tufën e fletëve të votimit që i numërohet njërës prej dy partive të mëdha.
Vetë kreu i kësaj partie, Shpëtim Idrizi, mandati i të cilit është në lojë për 38 votat e pretenduara si të vjedhura, deklaroi se provat që disponon tregojnë manipulimin e bërë nga komisionerët e PS-së dhe PD-së.
“KQZ ka të regjistruar 12 434 votues për PDIU-në, ndërsa limiti prej 3% është 12 470, me një diferencë 37 vota apo 0.01%. Në këto kushte na u desh të hetojmë dhe të konsultohemi me pamjet filmike të procesit të numërimit. Këto pamje i siguruam zyrtarisht në KQZ sipas ligjit. Ne kemi konstatuar që deri më tani mungojnë në pamjet filmike 100 qendra votimi dhe në rreth 50 qendra pamjet janë të padallueshme, në kundërshtim me ligjin. Deri më sot kur janë këqyrur rreth 65% e filmimeve, rezulton se: Në shumë tavolina numërimi ku PDIU nuk ka pasur numërues, del qartë se votat e PDIU-së të ndodhura në kuti, nuk pasqyrohen në proces-verbalet e numërimit të votave dhe rrjedhimisht edhe në tabelën e rezultateve”, -tha Idrizi.
Përveç denoncimit të PDIU-së, i cili është bërë zyrtar në KQZ, ka një denoncim tjetër zyrtar nga Partia Demokratikepër rezultatin në qarkun Berati. PD kërkon shpalljen të pavlefshme për shkak të parregullsive në procesin e votimit dhe të numërimit të dy kutive të votimit dhe përkatësisht të asaj që mban numrin 3318 dhe asaj me numër 3429.
Denoncimi i PD-së nuk pritet të ndryshojë rezultatet përfundimtare edhe nëse pretendimet e saj vërtetohen, pasi dy aprtitë e tjera në garë, PS dhe LSI, kanë diferenca të madhe votash në raport me PD-në në këto qendra votimi.
Ka dhe një denoncim publik nga ana e Ben Blushit, kreu i LIBRA-s për prekje të votës së kësaj partie nga komisionerët e Partisë Socialiste. Blushi nuk ka bërë ende një ankesë zyrtare në KQZ për pretendimet e tij, por në denoncimin publik nga ai përmenden me emra komisionerët në fjalë, që sipas Blushit janë të gjithë punonjës të administratës.
Blushi tha se do të ngrejë padi penale ndaj tyre.
Po çfarë ndodh nëse vjedhja e votave provohet nga KQZ, Kolegji Zgjedhore dhe prokuroria?
Në një rast të tillë sipas ligjit komisionerët që guxuan të vendosin dashurinë për partinë mbi respektin për ligjin rrezikojnë nga 1 deri në 7 vite burg.
Me ndryshimet e reja në Kodin Zgjedhor dhe Kodin Penal nuk do të ketë masa ndëshkimore si gjoba por vetëm burg për ata që do të tentojnë tjetërsimin e vullnetit të lirë të votuesve shqiptarë.
Ankimimet
Sot është afati i fundit zyrtar për ankimimet dhe kreu i KQZ, Klement Zguri, bëri me dije se ka marrë tre kërkesa të tilla nga PDIU dhe PS për Tiranën dhe PD për Beratin, të cilat do të shqyrtohe brenda 20 korrikut.
“Subjektet kishin të drejtën të kërkonin ndryshimin e tabelave përmbledhëse të rezultatit sipas qarqeve ose dhe pavlefshmërinë e rezultatit në një apo më shumë qendra votimi. Këtë të drejtë e kanë shfrytëzuar PDIU e cila ka kontestuar tabelën përmbledhëse të rezultatit për qarkun Tiranë, PD që ka kontestuar tabelën përmbledhëse për qarkun Berat si dhe PS e cila ka kontestuar tabelën përmbledhëse për qarkun Tiranë. Tabelat përbledhëse të rezultateve për qarqet e tjera nga sot nuk mund të kontestohen më. Kjo procedurë do të mbyllet brenda 20 korrikut”- tha Zguri. /tesheshi.com/
