Nga: Ylli Pata
Pesë vjet pas ngjarjes më të rëndë të përballjes së qytetarëve me shtetin, ku forcat e sigurisë që duhej të ruanin zyrtarët e shtetit qëlluan me plumba dhe vranë katër qytetarë, ende ka të panjohura dhe fakte të pazbardhura.
Dy gjykata shqiptare, ajo e Shkallës së Parë dhe e Apelit të Tiranës, me provë ekspertizën e FBI-së, kanë cilësuar si autorë të vrasjes së Ziver Veizit dhe të Faik Myrtajt ish-komandantin e Gardës, Ndrea Prendi, dhe një drejtues operacional të Gardës së Republikës, Agim Llupon. Njëra gjykatë i cilësoi si vrasës pa dashje, dhe Apeli si vrasës jo me paramendim. Kjo çështje ka vajtur në Gjykatë të Lartë, por ende shkalla më e lartë e gjyqësorit nuk e ka marrë në dorë atë.
Kreu i qeverisë aktuale, njeriu që drejtoi opozitën më 21 janar 2011, kur u vranë Ziver Veizi, Hekuran Deda, Faik Myrtaj dhe Aleks Nika, është betuar se kjo çështje do të zgjidhet nga drejtësia. Por kanë kaluar 5 vite, dhe familjarët e të vrarëve janë të irrituar, ndërsa vuajnë nga mungesa e drejtësisë për vrasjet e njerëzve të afërt të tyre.
Por cili është realisht “asi”, apo “leva e Arkimedit”, që e rihap 21 janarin, për të nisur nga e para i gjithë hetimi për katër vrasjet, por edhe për një sërë të plagosurish, që u morën në pyetje nga prokuroria e Ina Ramës, teksa nuk u ndoq e njëjta praktikë nga pasuesi i saj.
Ajo është një, dhe më e rëndësishmja. Bëhet fjalë për vrasjen e Aleks Nikës, lezhjanit që la dy vajza jetime; dhe për të ekspertiza nuk është shprehur ende, as nga ana balistike e as me dëshmi. Dy drejtuesit e Gardës së Republikës janë pafajësuar e më pas janë dënuar (edhe pse në mënyrë qesharake) vetëm për vrasjet e Ziver Veizit dhe Faik Myrtajt. Për të dy të ndjerët, FBI vërtetoi që plumbat e gjetur në trupat e tyre ishin nxjerrë nga automatiku i Agim Llupos dhe nga pistoleta e tipit “beretë” të Ndrea Prendit.
Për Hekuran Dedën e Aleks Nikajn, edhe pse ka pasur dëshmi, ende nuk është shprehur balistika pasi nuk është gjetur plumb, por vetëm gjurmë e tij.
Mirëpo, siç mësohet në laboratorin shkencor të FBI-së, por edhe të Turqisë, ku u dërgua nga Spitali Ushtarak Aleks Nika dhe ndërroi jetë, janë marrë të gjitha të dhënat shkencore për të gjetur plumbin që është qëlluar mbi të. Dhe sipas burimeve, këto hetime janë afër mbylljes, e asnjë prej këtyre provave nuk është bërë e ditur, për të shmangur dëmtimin nga të interesuarit, siç ndodhi me serverin e Kryeministrisë më 22 janar.
Siç bëhet e njohur, afër zgjidhjes është dhe vrasja e Hekurand Dedës, i cili u qëllua në podiumin e gazetarëve, dhe me atë plumb sipas të gjitha gjasave u plagos dhe gazetari Fatos Mahmutaj. Dëshmia e të cilit është jetike për zgjidhjen e çështjes. Ndonëse atë nuk e ka thirrur askush deri tani në gjykatë a në prokurori për të dëshmuar. Përveç njerëzve të Ina Ramës, të cilët së bashku me shefen e tyre u larguan të gjithë nga organi i akuzës. /tesheshi.com/
