Kosova përsëri ka aplikuar për anëtarësim në Interpol dhe kërkesa tashmë është pranuar në këtë organizatë, konfirmuan zyrtarët qeveritarë.
Zv.ministri i Brendshëm i Kosovës, Izmi Zeka konfirmoi se Kosova ka aplikuar për anëtarësim në Interpol më 31 janar të këtij viti.
“Interpol gjithashtu konfirmoi se kërkesa e Kosovës u pranua. Tani ka çështje teknike dhe aspekte politike që Kosova duhet të bëjë në përputhje me detyrimet diplomatike të saj, kështu që kur të mbahet sesioni i Interpolit, atëherë do të shohim situatën se si do të shkojë”, tha Zaka për Rtk.
Ai tha beson që këtë vit do të ketë më shumë angazhim që Kosova të jetë e barabartë me të gjitha vendet e tjera dhe do të ketë qasje të drejtpërdrejtë në Interpol.
Muaj më parë Kosova dështoi të anëtarësohet në Interpol, duke ia faturuar përgjegjësinë lobimit të fuqishëm serb. Më pas erdhi dhe hakmarrja me vendosjen e taksës doganore, e cila vijon dhe sot e kësaj dite. /tesheshi.com/
