Fillimi i ndërtimit të një xhamie në Mitrovicë i ka zemëruar banorët e lagjes, të cilët donin që në një lokacion privat të ndërtohej një ambulancë apo shkollë, dhe jo objekt fetar nga një investitor privat.
Madje, 40 banorë të lagjes Sylani të Mitrovicës janë organizuar për një protestë para komunës.
Sipas tyre, ndërtimi i xhamisë është i pavend, ngase zona ndjen mungesën e një shkolle dhe një ambulance. Protestuesit përmes një shkrese të bërë nga banorët e lagjes, janë kërkuar revokim të menjëhershëm të lejes së ndërtimit të xhamisë, deri në arritjen e një marrëveshjes në mes palëve.
Disa nga organizatorët e kësaj proteste u takuan me nënkryetarin e komunës së Mitrovicës, Faruk Mujka dhe me pas të gjitha kërkesat e tyre i ndanë me mediat përmes një shkrese.
Në këtë letër thuhet se banorët nga komuna e Mitrovicës po kërkojnë që të gjejnë një zgjidhje për ndërtimin e objekteve për shërbime shëndetësore apo arsimore, dhe jo objekte të besimit fetar.
Ndërtimit të xhamisë fillimisht i ishte dhënë leja e ndërtimit, por më pas ishte pezulluar në vitin 2017 për shkak të kërkesave si këto të sotmet. Për shkak se leja është pezulluar, dhe jo revokuar, punëkryrësit kanë inspektuar zonën për të rifilluar, gjë që kishte alarmuar deri në protesta banorët anti-xhami të lagjes. /tesheshi.com/
