Dhjetra familje që trajtohen me ndihmë ekonomike në Lezhë kanë protestuar para Bashkisë, pasi prej tre muajsh nuk e kanë marrë këtë pagese, si shkak i mosmbledhjes së Këshillit Bashkiak. Ata thonë se kjo situatë i ka vënë në vështiresi financiare, duke deklaruar se janë zhytur në borxhe për të siguruar bukën e gojës. Më tej ata fajësojnë insitucionet përgjegjëse duke thënë se po tallen me shtresën e varfër.
“Prej tre muajsh ne se kemi marrë ndihmën ekonomike. Nuk e kuptoj pse na sorollasin sa në një zyre në tjetrën. Ne po vdesim për bukën e gojës, s’na jep askush më borxh pasi lista ka shkuar shumë e gjatë. E vetmja e ardhur për familjen time është ndihma ekonomike, pasi të gjithë jemi të papunë. Kryetari i Bashkisë vetëm erdhi e mori votat, tani as nuk do t’ja dijë për ne. Kemi tentuar disa herë për ta takuar, por as në bashki s’na lënë të hymë”, thonë një qytetare në nevojë
Nga ana tjetër, Drejtori i Shërbimit Social në Bashkinë Lezhë, Jak Pjetri thotë se “topi” është në anën e Këshillit Bashkiak.
“Bashkia e ka bërë gati të gjithë dokumentacionin e ndihmës ekonomike dhe gjithçka është bërë në kohë. Shkak për këtë vonesë është bërë veëtm mosmbledhja e Këshillit Bashkiak. Ne bashkohemi me shqetësimin e këtyre qytetarëve të cilët janë në vështirësi. I bëj thirrje këshillit që të mblidhet sa më parë për të miratuar ndihmën ekonomike për familjet në nevojë”, shprehet Jak Pjetri.
I kontaktur nëpërmjet telefonit, kryetari i ri i Këshillit Bashkiak të Lezhës, Kristjan Gjidoda ka bërë të ditur se insitucioni i Prefektit tashmë i ka legjitimuar lëvizjet e fundit në këshill dhe brenda dy ditëve do të zhvillohet mbledhja për miratimin e ndihmës ekonomike të tre muajve sëbashku. /tesheshi.com/
