Me lule dhe qirinj në duar, dhjetëra qytetarë zhvilluan një protestë-homazh për Florenc Beqirajn, të riun nga Shkodra që ndërroi jetë në Francë në mënyrë misterioze.
Qytetarët dhe përfaqësues të shoqërisë civile të mbledhur përpara “Piramidës” kanë kërkuar nga ana e shtetit që të zbardhet e vërteta për rastin e Florenc Beqirajt. Ata i kanë bërë thirrje shtetit që të ndihmojë familjen e viktimës në Shkodër, e cila nuk ka mundësi të marrë trupin e pajetë të të birit.
Shoqëria civile i bëri thirrje kryeministrit Rama të mos sillet si kryeministër i turistëve, port ë mbajë përgjegjësi për shtetasit e vet.
Pas Piramidës, protestuesit marshim drejt Kryeministrisë dhe më pas tek ambasada franceze në Tiranë.
Ndërkaq, përfaqësues të presidentit Meta janë takuar me familjarë të të riut ku kanë premtuar ndihmë për sjelljen në atdhe të trupit të pajetë dhe po ashtu, janë angazhuar për zbardhjen e rastit. /tesheshi.com/
