Banorët e “Astirit”, ata që prej ditësh kanë shpërthyer në protesta kundër prishjes së shtëpive apo godinave me biznese në pronësi të tyre për shkak të Unazës së Madhe, u zhvendosën këtë të hënë para Bashkisë së Tiranës. Ata kanë kërkuar një ballafaqim me kreun Erion Veliaj, e, duke patur në krah si mbështetje edhe deputetë të PD-së, kanë qëlluar me vezë në drejtim të murreve të Bashkisë.
“I kemi dhënë votën PS-së, tani po na shkatërron shtëpitë. Kryebashkiakut i bëjmë thirrje të vijë këtu”, tha një prej protestuesve. “Ne nuk tërhiqemi. Për dy gjëra jeton njeriu: për nder dhe shtëpi. Shtëpitë tona nuk do të gremisen”, shtoi ai.
“Erion Veliaj të vijë këtu si burrë. Kam qenë i PS-së, por jo të më marrësh nusen e djalit të më lindë aty në burg. Ky po na prish shtëpitë dhe po na shkatërron. Turp!”, tha një tjetër, ndërkohë që pati dhe thirrje mallkuese me karakter fetar.
“Xhenhemi ju pret të gjithëve o hajdutë, ferri dhe xhenhemi”, ishte një prej tyre. /tesheshi.com/
