Punonjësit e Shtëpisë Mbretërore britanike rrallë protestojnë, por ja që u mblodhën të martën përpara një prej rezidencave kryesore të Mbretëreshës Elizabeth – Windsor Castle, duke protestuar kundër zvogëlimit të planifikuar të numrit të punonjësve, njoftoi sindikata e tyre.
Sindikata e PCS postoi në Twitter foto të punonjësve që protestonin kundër shkurtimeve të pensioneve dhe largimeve nga puna para hyrjes kryesore të kalasë.
PCS njoftoi se 200 punonjës janë të tepërt dhe planifikohen ulje pensionesh.
Punonjësit mbajtën një protestë të heshtur me figurën e gdhendur të mbretit Henry VIII.
“Mbreti Henry ka prerë koka … Tani ata duan të na ndërpresin punët dhe pensionet,” shkruhej në një banderolë.
Punonjësve me pagë më të ulët në tre rezidencat mbretërore, Windsor, Buckingham dhe Holyrood, u është ulur pagesa e fondit të pensionit nga 15 në 8 përqind.
Fondacioni, i cili administron kështjellat dhe 600 punonjës, ka konfirmuar se po përpiqet të ulë kostot për shkak të pasojave të pandemisë. /tesheshi.com/
