Nga Mensur Krasniqi
As që ishte menduar se mund të ndodhte. Me dhjetëra maqedonas me banim neSHBA u mblodhën para kullës se presidentit të ardhshëm amerikan, Donald Trump në Nju Jork, duke protestuar kundër administratës së kaluar amerikane dhe ambasadës në Shkup që sipas tyre kanë përkrahur fondacionin e biznesmenit miliarder, Xhorxh Soros dhe politikat e tyre destruktive karshi Maqedonisë.
Sipas tyre, Xhorxh Soros e ka shtrirë ndikimin e tij nëpërmjet projekteve në fushën e mediave dhe zhvillimin e shoqërisë qytetare.
“Ne jemi këtu për ta përkrahur pavarësinë e Maqedonisë, anëtarësimin në NATO dhe integritetin territorial”, thuhet në mesazhin e protestuesve.
“Ju lutemi na mbroni nga Soros!”, shkruan në njërën nga parullat e protestuesve.
Dëshmi tjetër se Soros është “halë në sy” të pushtetit maqedonas, vlen të përmendet mega-intervista e fundvitit për edicionin elektronik të javores “Republika”, ku lideri i VMRO DPMNE-së Nikolla Gruevski, hapësirë shumë të madhe ndau për ballafaqimin me “Xhorxh Sorosin dhe të gjitha milionat që i derdh në Maqedoni” dhe me “gazetarët e korruptuar, pronarë të mediave, profesorë, intelektualë, analistë, aktivistë, të udhëhequr nga protestues profesional”.
“Po të mos ishte Sorosi me rrjetin e OJQ-ve, mediat, politikanët, brenda dhe jashtë që i paguan, ndikim në shtetet më të fuqishme në botë, edhe atë ndikim vendimmarrës kur bëhet fjalë për shtete më të vogla siç është e jona, nuk do të ishte aq vështirë ndërsa edhe ekonomia do të ishte më e fuqishme, do të kishim më shumë vende të hapura të reja pune”, tha Gruevski në intervistë me titull indikativ “Sektori civil nuk guxon të ngel në duart e Sorosit”.
Dhe në fund sa për kurriozitet, Gruevski po në këtë intervistë për javoren “Republika”, ka përmendur emrin e miliarderit amerikan 53 herë.
Andaj nuk është spontane fakti që sot protestuesit maqedonas kaë dalur të protestojnë në SHBA kundër Sorosit.
Nga VMRO shpresojnë se me ardhjen e Donald Trumpit si president i shtetit, Maqedonia, gjegjësisht partia e VMRO-së do të ketë mbështetje më të madhe, pasi që cilësohen si parti të djathta. /tesheshi.com/
