Pesë ditë protesta masive të njëpasnjëshme në rrugët e Bukureshtit dhe të qyteteve të tjera të Rumanisë e kanë bërë qeverinë e këtij vendi që të vendosë ta tërheqë dekretin për korrupsionin.
Ky dekret, që i dekriminalizonte disa vepra korruptive dhe u jepte mundësi zyrtarëve të dënuar për korrupsion që të linin qelitë, u bë shkas për protestat më të mëdha në Rumani që prej rënies së komunizmit në fund të viteve ’80 të një shekulli më parë.
“Nuk dua ta ndaj Rumaninë. Ajo nuk mund të ndahet në dysh,” u shpreh kryeministri Sorin Grindeanu në një deklaratë televizive. I njëjti kryeministër që ditë më parë përbetohej se do të shkohej përpara me dekretin, deklaroi mbrëmë se ai do të shfuqizohej këtë të dielë.
Grindeanu mësohet të ketë thënë se dëgjoi zërin e rrugës, se dëgjoi shumë opinione, e se parlamenti do të shqyrtonte tani një ligj të ri për korrupsionin.
Lajmi për zmbrapsjen e qeverisë i ka kthyer mbrëmë protestat në Rumani në festime. /tesheshi.com/
