Një zë nga qeverisja, ai i Artan Lames, njeriut të vënë në krye të legalizimeve duke drejtuar prej 5 vitesh ALUIZN-in e themeluar në kohën e Berishës, u ka “dhënë të drejtë” banorëve protestues të Unazës, atyre që nuk pranojnë të lëshojnë shtëpitë apo bizneset e tyre, për t’i hapur rrugë projektit të Unazës së Re.
Sipas Lames, ata kanë të drejtë në pikën që shteti, politika, e ka sjellë punën deri këtu, duke lejuar një bartërdi me pronat dhe duke mos i legalizuar në kohën e duhur; kjo e fundit si vërejtje, referuar qeverisjes së PD-së.
“Ka një kaos institucional në lidhje me pronat. Ndarja e tokës është bërë me një proces abuziv. Dhe pastaj banorët protestojnë. Kanë të drejtë. Banorët protestojnë sepse shteti është i paaftë dhe nuk e përfundoi procesin e legalizimit”, ka deklaruar Lame, i njohur për gjuhën e tij të troçtë dhe pa sofistikime politike.
Edhe Lame ka mbrojtur tezën e “lejimit për abuzim” nga ana e shtetit, gjë që më pas ka sjellë si pasojë zhvillimet e sotme me rebelim qytetar.
Ndërsa teza e Ramës në këtë rast, është: i la shteti por nuk i lejonte ligji! Sipas Ramës, edhe pse shteti ka qenë i dobët për të reaguar, duke lejuar qytetarët që të abuzojnë me pronën duke ndërtuar në paligjshmëri, ligji gjithsesi aty ka qenë dhe duhej respektuar. /tesheshi.com/
