Teksa opozita në Shqipëri vetëdiskretitohet me ca kinse protesta anti-Rama ku me zorr mblidhen një mijë veta, të cilët, në pamundësi për t’u imponuar si masë e madhe njerëzore zgjedhin të bllokojnë rrugë e provokojnë incidente, në Beograd është krejt tjetër gjë.
Mbi 100 mijë protestues anti-Vuçiç u tubuan në zemrën e kryeqytetit serb, duke e kolapsuar atë jo me zorr e sforco, por thjesht si masë gjigande njerëzore.
Protesta, apo protestat, pasi kanë ditë që vazhdojnë, kanë në ballë studentë, por dhe fermerë.
Homazh për 15 të vrarët në Novi Sad
Të mbledhurit nderuan 15 personat që vdiqën në rënien e tendës së stacionit hekurudhor në Novi Sad me 15 minuta heshtje.
Ata edhe një herë kërkuan nga autoritetet në Serbi që të procedojnë të gjithë ata që janë përgjegjës për aksidentin dhe sulmet ndaj qytetarëve që morën pjesë në protestat e javëve të fundit.
Përfaqësuesit e studentëve dhe fermerëve, siç bënë të ditur para protestës, nuk kanë pasur adresa zyrtare.
Qytetarët që morën pjesë në tubime mbështetën studentët dhe kërkesat e tyre.
Studentët e universiteteve shtetërore në Beograd, Kragujevc dhe Nish kanë protestuar prej javësh, duke kërkuar publikimin e të gjitha dokumenteve që kanë të bëjnë me rinovimin e stacionit, si dhe ndjekjen penale të përgjegjësve për fatkeqësinë.
Por si reagoi Vuçiç ndaj saj?
“Një ditë e madhe për Serbinë, u hap autostrada e re 30 km, opozita organizoi një protestë të madhe… I ftoj të gjithë të vazhdojmë të punojmë së bashku për të gjithë njerëzit në vendin tonë dhe t’u sigurojmë atyre një të ardhme të sigurt. Serbia nuk duhet dhe nuk do të ndalet!”, shkroi ai në rrjete.
Gjithsesi, këto janë aspekte të politikës dhe shoqërisë serbe. Lajmi vlen për një kontekst krahasues. PD-ja ka protestën e radhës këtë të hënë në Tiranë, ku dihet tashmë se sa njerëz mbledh, çfarë bën dhe sa orë zgjat. Dihet dhe fundi: ajo proteston e qeveria vazhdon. Dhe kur vijnë zgjedhjet, ajo humbet e pushteti prapë fiton. /tesheshi.com/
