Nga Blendi Gashi
Vetëvendosje e Albin Kurtit ka paralajmëruar organizimin e protestave për ta ndalur Thaçin që të bisedojë me Serbinë për siç thotë korrgjimin e kufijve, që opozitarët e quajnë ndarje të vendit.
Ndërsa Thaçi të premten e javës tjetër udhëton drejt Brukselit për të folur me homologun serb, Vuçiç opozita nuk ka ende një qëndrim unik rreth mbajtjes apo jo të protestës. Krejt çfarë janë pajtuar deri më tani është mbajtja e një seance të jashtëzakonshme të Kuvendit ku synojnë ta votojnë një rezolutë që do t’ia ndalonte Thaçit të bisedonte për tërësinë territoriale.
Por kjo po shihet e pamjaftueshme nga vetëvendosësit por edhe deputet të caktuar të grupit parlamentar të LDK-së për çka kanë bërë thirrje të organizohet një protestë për ta ndalur Thaçin.
Por aktualisht vazhdon të mungojë një përgjigje zyrtare nga partia e Isa Mustafës rreth protestës së paralajmëruar nga vetëvendosësit e cila siç duket nuk është e gatshme të dalë në rrugë dhe të vetmen mënyrë për ta stopuar Thaçin e sheh përmes Kuvendit.
“Nuk ka mekanizëm politik më të fuqishëm për të shprehur vullnetin e qytetarëve të Kosovës, përmes deputetëve të Kuvendit të Kosovës, si të zgjedhur të qytetarëve. Askush nuk duhet të ketë guxim të ndërmarrë hapa që bien në kundërshtim me vullnetin e shumicës dërmuese të deputetëve në Kuvendin e Kosovës”, thuhet në deklaratën e lëshuar të mërkurën nga grupi parlamentar i LDK-së.
Por ky qëndrim po shihet i mjaftueshëm nga zëri më i fuqishëm në LDK, deputetja Vjosa Osmani që hapur ka dalë pro VV-së për organizim të protestave.
Ajo përmes një shënimi në Facebook ka thënë se Rezoluta e Kuvendit është e pamjaftueshme për të ndalur, siç ka thënë “aventurat e rrezikshme të Thaçit”, pasi thotë se presidenti mbanë titullin e kampionit për shkelje të Rezolutave të Kuvendit.
“Prandaj, më 7 shtator, kur Thaçi udhëton për Bruksel për të bërë edhe një hap tutje drejt ndarjes së Kosovës, ne qytetarët e Kosovës, do të duhej të protestonim paqësisht, por masovikisht, për t’i dëshmuar atij dhe kujtdo tjetër që Kosova është një dhe e pandashme”, shkruan Osmani në Facebook.
Por shefi i grupit parlamentar të LDK-së, Avdullah Hoti, është distancuar nga kjo deklaratë, duke thënë se Osmani nuk paraqet qëndrimin e partisë.
Ndërkaq një zëri me deputeten Osmani është shprehur deputeti i Alternativës, Ilir Deda, që bën pjesë në grupin parlamentar të LDK-së.
“Vija e kuqe Thaçit i vendoset së pari në Kuvend me 4 shtator, e mandej edhe në protesta masive qytetare”, shkruan ai në Facebook.
Pavarësisht këtyre zërave Vetëvendosje ende nuk ka caktuar ndonjë datë të saktë se kur mund të mbahet protesta e tyre.
Krejt çfarë ka thënë deputeti Ismail Kurteshi lidhur me këtë çështje është se protesta do të duhej të mbahej para se të nisë faza e radhës e dialogut me Serbinë, përkatësisht para 7 shtatorit të këtij viti. \tesheshi.com/
