Nga Ermir Hoxha
Siç është konfirmuar tashmë, PD dhe LSI janë bërë sërish bashkë, si dje në pushtet e sot në opozitë, përballë të njëjtin njeri: Edi Rama. Dhe në të dyja rastet, më shumë se u dhimbset fati i Shqipërisë, shprehur me një patetizëm që për vetë zhvillimet e viteve të fundit nuk ngjit shumë, sidomos nga LSI, është një inat tip shqiptar që i bën bashkë: në 5 vite, Rama ka arritur t’i poshtërojë më shumë se sa t’i mundë, veçmas të dy partitë, e që tani me gjasë po e shijon fakti që sërish i detyroi të bëhen bashkë, si një tjetër fitore në kurthin që u ka ngritur.
Kjo shkon dhe me bindjen e ndërkombëtarëve se të dyja nuk e duan reformën në drejtësi. Ndaj dhe bëhen bashkë.
Bashkimi i sërishëm PD-LSI nuk është një opozitë më e fortë përballë Ramës, por një kapitullim moral, sidomos nga PD. LSI vetë nuk ka çfarë humb më. Asaj i lejohet të bëjë aleancë me çdo djall, se tek e fundit kështu është profilizuar si parti, por PD-së jo.
Demokratëve nuk u lejohet që të bëjnë gabimin historik të verës 2009, ku nga një pakt i pisët, krejtësisht i evitueshëm, u çnderuan si parti derisa humbën pushtetin. Madje rrudhja që ka pësuar PD është aq e frikshme, sa do donte ripërpunim të të gjithë kredos morale, ku si përbetim të ishte mosbashkëpunimi kurrë më me LSI-në, ose SHPK-në, siç Basha e quante në fushatën elektorale të qershorit, duke marrë si shpagim dhe deformimin e emrit me trajtë përkëdhelëse, në thelb përçmuese, nga Luli në Lulush, mu prej Ilir Metës nën xhinde. Nuk duhet ta bëntë këtë dhe për faktin se LSI e ka kredo nga ana e saj, ta lartojë veten mbi PD-në, Monika mbi Lulin, siç te protestat e fundit para parlamentit, duke u vetëshpallur qyshse ranë nga pushteti, si opozita e vërtetë. Koha dhe disa përvoja kanë treguar se PD e LSI bashkë, as elektoralisht nuk e cenojnë dot Ramën.
Stina e protestave të PD-së duhej të kishte patur dy objektiva paralele: denoncimin e mëkateve të qeverisjes së Ramës, e ç’është më kryesorja, pasi atë e bëjnë dhe vetë qytetarët me sensorët e tyre, promovimi i një morali të ri politik, përkthyer pa SHPK-në (citojmë Bashën) në krah.
Me LSI-në krahëqafë, nëse citojmë të ndjerin Kasëm Trebeshina, foshnja që pritet të lindë, do rezultojë sërish e vdekur. /tesheshi.com/
