Miroslav Lajçak, njeriu në krye të OSBE-së, e ka quajtur deri dhe kriminale dhunën e ushtruar nga militanca opozitare në protestat e saj. Në një prononcim për TCH, diplomati i njohur pretendon se aksioni opozitar po e dëmton të ardhmen strategjike të vendit.
“Më duhet të shtoj se përshkallëzimi i dhunës gjatë disa protestave të drejtuara nga opozita është shumë shqetësuese dhe duhet të ndalet menjëherë. Trazirat nuk mund të zëvendësojnë angazhimin politik demokratik. Ato ndërpresin çdo mundësi për dialog – dhe si pasojë çdo mundësi për të gjetur gjuhën e përbashkët.
Ndërsa është e rëndësishme të dëgjohen zërat kritikë dhe protestat paqësore janë një e drejtë themelore e qytetarëve tanë, vazhdimi i protestave të dhunshme përbën një veprim kriminal dhe do të dëmtonte përpjekjet e Shqipërisë për reforma dhe pashmangshmërishtdo të pengonte përparësitë e saj strategjike brenda dhe jashtë vendit”, tha Lajçak.
Sipas tij, me këtë që po ndodh, vendi po kthehet në ’90-ën
“Vendimi i anëtarëve të opozitës për të hequr dorë nga mandatet është me të vërtetë për tëardhur keq. Demokracia ka nevojë për sistemin e kontrollit dhe balancës dhe një opozitë funksionale luan një rol kyç – në parlament, jo jashtë tij .Duke hequr dorë nga mandatet, opozita po vë në rrezik fitoret demokratike të arritura në Shqipëri. Dhe, më lejoni të theksoj, në një shoqëri demokratike, pjesëmarrja në zgjedhjet dhe institucionet demokratike është e vetmja rrugë e ligjshme drejt pushtetit politik.
Gjithashtu, duhet të mendoni për dëmin që i bëhet imazhit të Shqipërisë në komunitetin ndërkombëtar. Ju doni të shiheni si një demokraci e shëndetshme që po ecën përpara, me një opozitë të fortë e të artikuluar brenda parlamentit. Ajo që shohim tani është e kundërta.
Kjo nënvleftëson besueshmërinë e Shqipërisë në arenën ndërkombëtare dhe rrezikon mundësinë e integrimit të mëtejshëm. Këto lloj taktikash politike penguese po e kthejnë vendin në vitet ‘90 dhe nuk i shërbejnë askujt përveç se interesave politike të atyre që i praktikojnë ato”, tha Lajçak. /tesheshi.com/
