Shkupi përjetoi natën e dytë të protestave, të cilat erdhën sapo u publika një “bombë” mbi vrasjen e të riut maqedonas Martin Neshkovski, ku qeveria ishte përpjekur ta fshihte. Por ndryshe nga mbrëmja e së martës ku mbetën të plagosur disa policë e protestues, të mërkurën nuk pati incidente.
Policia rrethoi dy rrugët që të çojnë në selinë qeveritare duke penguar kështu protestuesit t`i afrohen objektit. Ndërkohë, protestuesit zgjodhën të shkojnë para godinës së parlamentit, ku dhe u stacionuan.
E reja ishte përhapja e valës së protestave dhe në qytetet të tjera të Maqedonisë, pra duke mos mbetur vetëm në kryeqytetin Shkup. Ishin Prilepi dhe Manastiri ato të cilat u aktivizuan në lëvizjen antiqeveritare, e cila pra sapo ka nisur.
Dhe duhet thënë se kjo valë u paralajmërua gjatë gjithë muajit prill. Nga faktorë opozitarë u tha rregullisht se maji do ishte muaji i rrëzimit të qeverisë, pikërisht nga një valë protestash që do shpërthenin.
Sakaq, edhe diplomacia ndërkombëtare po reagon gjithnjë e më fort, çka nuhatet se është dhe ajo e angazhuar për t`i dhënë një zgjidhje situatës së krizës në Maqedoni.
Komisioni Evropian, në një reagim ka shprehur keqardhje dhe shqetësim për gjendjen në Maqedoni, duke u përqëndruar tek rastet e dhunës mbrëmjen e së martës.
Zëdhënësja e KE-së, Maja Kocijançiç, tha:
“Si parim i përgjithshëm, Komisioni përsërit rëndësinë kyçe të lirisë dhe protestës të qetë sepse kjo është vlerë e bazuar në demokraci funksionale. Përsëris nevojën që të evitohet përdorimi i forcës disproporcionale nga policia. BE do të dëshironte të rikujtoj se nga aktorët politik pritet menjëherë të ndërmarrin aksione për gjetjen e zgjidhjes së qëndrueshme për krizën politike, përmes angazhimit konstruktiv për fillimin e dialogut përkatës politik dhe të kthehet besimi në institucione.”
Ndërkohë, shefi i Misionit të OSBE-së në Shkup, Ambasadori Ralf Bret, ka shprehur shqetësimin e tij në lidhje me zhvillimet e fundit para qeverisë:
“E drejta e tubimit dhe protestës paqësore është e drejtë e garantuar me kushtetutë për të gjithë qytetarët e vendit. Megjithatë, protestat e tilla nuk duhet të shoqërohet me dhunë Secili qytetarë duhet të jetë në gjendje të shpreh mendimin e tij dhe duhet ta bëjë një mënyrë paqësore dhe të përgjegjshme, ndërsa forcat e rendit duhet të bëjnë punën e tyre për të ruajtur rendin dhe sigurinë publike”.
Siç shihet, deklaratat kufizohen tek rastet e dhunës, por nuk kanë munguar dhe ato të cilat kanë si nëntekst apelet drejtuar qeverisë që të reagojë, që nënkuptojnë dorheqjen. /tesheshi.com/
