Policia maqedonase ka arrestuar 26 persona, të cilët gjatë protestës kundër marrëveshjes për emrin e ri me Greqinë kanë ndërmarrë akte dhune dhe sjellje jashtë normales.
Policia thotë se e respekton të drejtën për protestë të qetë, por dhe se nuk do të lejojë përdorimin e forcës ndaj nëpunësve policorë dhe hyrje të dhunshme në institucione.
Por protestuesit maqedonas kanë filluar që në rrjetet sociale të shpërndajnë foto-lajme të konsideruara si “të rreme”, gjegjësisht fotografi të vjetra të personave që janë të lënduar nga policia në ngjarje tërësisht të tjera, pra që nuk ka të bëjë me protestat për emrin.
Kjo ka sjellë dhe reagimet e disa qytetarë, ku njëri prej tyre ka postuar foto të aktorit hollivudian Silvester Stalone duke ironizuar se edhe ai është rrahur nga policia, gjithashtu edhe këngëtaren Severina, si dhe një grua serbe të lënduar para 3 viteve, sipas asaj që raportuar mediat serbe për të.
Këshilli për Etikë në Media thotë se nga lajmet e rrejshme përfitojnë grupe të caktuara.
Për shkak të lëndimeve, në disa klinika të Shkpit kanë përfunduar dhe 10 policë e 7 protestues.
Komiteti i Helsinkit, edhe pse ka qëndrim të njëjtë se protestuesit kanë qenë të dhunshëm, megjithatë vlerëson se edhe MPB-ja ka përdorur mjete kimike të tepërta.
“Sipas Ligjit për policinë, përdorimi i mjeteve për zbrapsje duhet të jetë adekuat dhe proporcional. Në situatën e dhënë, kjo gjë vendoset në pikëpyetje, posaçërisht për shkak se mes qytetarëve që kanë protestuar ka pasur persona të moshuar dhe fëmijë”, thonë nga Komiteti i Helsinkit për të drejtat e njeriut.
M.Hasani – /tesheshi.com/
