Ka qenë një paradite e trazuar me dhunë mes policisë dhe qytetarëve e pozitës, të cilët kanë protestuar ditën e sotme tek parku i liqenit, kundër ndërtimit të parkut të parashikuar nga ana e bashkisë.
Pas momenteve të shumta të tensionit, policia ka shoqëruar ish- deputetin Ndriçim Babasi dhe rreth 30 të rinj të Forumit Rinor të Partisë Demokratike. Nga ana e saj, opozita ka deklaruar se ndalimi është bërë me dhunë dhe se nuk janë respektuar të drejtat e tyre.
PD thotë se janë goditur deputetët Ridvan Bode dhe Edi Paloka, si dhe këshilltari bashkiak, Leonard Olli.
Nuk ka munguar as reagimi i bashkisë së Tiranës, e cila deklaron se protestuesit demokratë kanë ushtruar dhunë mbi policinë dhe kanë qenë një rrezik potencial edhe për jetët e tyre.
“Njëri prej tyre ka qenë edhe deputeti, Gent Strazimiri, i cili teksa shtyhej dhe godiste fizikisht efektivët e policisë, i ka dalë arma që mbante në brez. Ai ka qenë pajisur me një pistoletë, të cilën shpesh herë kujdesej që të mos i binte në tokë”, thotë Bashkia Tiranë.
Gjatë deklaratës së tij përpara ambienteve të komisariatit të policisë, deputeti demokrat Arben Ristani akuzoi qeverinë duke thënë se ajo po tallet me qytetarët.
“Po kërkojmë të takohemi me njerëzit që janë ndaluar. Po tallen me ne. Ka një orë që po presim. Askush nuk po përgjigjet. Sot Partia Demokratike ishte në mbështetje të shoqërisë civile, në krah të protestës së tyre te kodrat e liqenit. Ndërkohë që Rama dhe të vetët po shtojnë pasuritë, dhuna dhe varfëria e qytetarëve po bëhet e padurueshme”, – tha Ristani.
I pyetur në lidhje me fotografinë e deputetit Strazimiri me armë në brez, z. Ristani e cilësoi këtë si një mashtrim të pastër dhe manipulim të medias.
“Këto janë mashtrime dhe manipulime. Strazimiri është deputet shembullor. Protesta jonë po shoqërohet me një black out mediatik. Kësaj proteste të popullit nuk do të mund t’i ndalemi dot. Këtë kauzë nuk e ndalim. Është mashtrim deputeti me armë në brez. Do të jemi çdo ditë dhe më shumë për t’ia dalë mbanë. Jemi kundër dhunës dhe grabitjes së këtij populli”, – tha ndër të tjera Ristani, i cili shtoi se qytetarët duhet të ndërgjegjësohen që nuk e meritojnë këtë qeveri që kanë.
Sa i takon deputetit Strazimiri, pritet konfirmimi nga ana e policisë për të mësuar nëse në pamjen e mësipërme, ajo që duket si pistoletë është me të vërtetë një pistoletë apo diçka e ngjashme. /tesheshi.com/
