Protesta e opozitës pati afërsisht të njëjtën pamje, një pjesë me paqe e një pjesë jo, pavarësisht thirrjeve të fuqishme ndërkombëtare për mosushtrim dhune.
Fillimisht para kryeministrisë, gjithëka u zhvillua, normalisht. Prej aty, mesazhi politik i Bashës ishte mostërheqja, edhe pas thirrjeve të ndërkombëtarëve, nga synimi për largimin e Ramës, jo me votë por me dorëheqje.
“Dua të siguroj këto mik dhe aleat që na dëgjon sot për zotimin tonë të parë, ditën e parë të kësaj beteje më 16 shkurt se ne nuk kërkojmë asgjë më shumë se parimet, vlera dhe normat e standardeve demokratike, se normat e standardeve të Amerikës, ne kërkojmë liri, demokraci, sundim ligji dhe ndarje të pushteteve.
Nuk do të pranojmë asgjë më pak. Me këtë fuqi do të vazhdojmë betejën tonë, sepse ora e fitores po afron. Largimi i Edi Ramës është i pa negociueshëm”, tha Basha.
Më pas, turma ndoqi itinerarin e zakonshëm, atë drejt parlamentit, ku dhe vijoi rituali i hedhjes së shashkave, kapsollave, tymueseve.
Në një atmosferë të tymtë e me kakofoni pëlcitjesh, presidenti Meta bëri thirrje për ndërprerje të protestës, duke rrëshqitur në pozitën e një drejtuesi opozitar. /tesheshi.com/
