Protesta e radhës e opozitës u mbyll duke patur një masë më të tkurrur njerëzore, kjo dhe për shkak të mungesës së kryetarit Basha. Ndaj, Edi Paloka që tha “fjalën e fundit” në vend të tij, e ceku këtë detaj, por në variantin optimist.
“Ne mund të jemi një ditë më pak, e një ditë më shumë”, tha Paloka, duke shtuar: “shumë shpejt do ta shihni se si do të marrë vrapin dhe nuk do të dijë ku të ndalet nga udhëheqja qytetare”.
Më tej, nr.2 i PD-së preferoi një konvertim të fjalës “Ik” referuar shefit të mazhorancës
“Rama ik, Rama shporru, shqiptarët nuk të duan më”, kumtoi Paloka.
Nga ana tjetër, Rama nga foltorja e parlamentit dha mesazhin se ky duhet të jetë dhe fundi i një historie me opozita që kërkojnë zgjedhje të parakohshme, sipas tij, si t’u teket.
Madje ai paraljamëroi se opozita e mbetur jashtë mund të “shkojë për skrap”me formën e zgjedhur, e kjo duke u përcjellë një apel atyre që po formësojnë opozitën e re në parlament.
“Karrigia e tyre është me afat, nuk është pa afat. Ata mund të kenë ende shpresë se këtu do vijnë nga qielli negociatorë edhe do na ulin në tavolinë dhe do na thonë hë tani djema si do ta normalizoni këtë punë. Ka vetëm një normalizim të mundshëm, të nevojshëm, të domosdoshëm, mbyllja e kapitullit 30 vjet ‘unë po iki po s’më thirre. Unë nuk rri po s’më dhe atë që dua, unë po bëj këtë po s’më bërë atë’. Ky kapitull do mbyllet tani, është koha për ta mbyllur. Çdo parti politike kur vjen në Kuvend duhet ta mendojë mirë.
Vjen në opozitë është në opozitë, nuk ka xinxri-finxri jo jam në opozitë por e dua pushtetin të nesërmen e betimit se dua zgjedhje të parakohshme. Ato mund të bëhen për propagandë por nuk mund të bëhen me metoda kërcënimi, me metoda shantazhimi, me metoda bllokimi. Ata mund ta dëmtojnë edhe çeljen e negociatave. Ata po e dëmtojnë. Ata mund ta dëmtojnë edhe ekonominë, edhe sezonin turistik, edhe imazhin e Shqipërisë, të gjitha po i bëjnë. Është përgjegjësia e tyre, turpin le ta mbajnë vetë.
Por një gjë duhet ta kenë shumë të qartë: PS e ka mision historik sot të mbyllë këtë kapitull të gjatë zvarritjesh në histori ‘jo po ulemi, jo po negociojmë, jo po të vijë mediatori, jo po të thërrasim këtë, jo po të marrim dy ambasadorë…’. Nuk ka më të tilla. Ka kushtetutë, ka mandat, ka ligj. Ne nuk e kemi marrë mandatin për të negociuar përpara se sa të vijnë zgjedhjet e vitit 2021. Ka apo s’ka zgjedhje të parakohshme këtë gjë kurrë nuk mund ta përcaktojë shantazhi, kërcënimi dhe asnjë lloj negocimi, zero. Kjo është pjesë e mënyrës se si ndërtohen strategjitë e brendshme por kjo është thjesht dhe vetëm vullnet i njëanshëm i PS në rast se do të gjykojmë ne por jo për shkak të tyre. I kemi mundur dhe ju bashkë me ata, ju kemi mundur, do ju mundim prapë dhe do ju mundim më thellë. Bëni mirë të ndaheni një orë e më para nga ta, jo thjesht kush është brenda, kush është jashtë por t’i jepni Shqipërisë një zgjidhje tjetër që të ketë një mundësi tjetër se ato dy sigla ne do i çojmë për skrap. Kaq po ju them”, deklaroi Rama në seancë. /tesheshi.com/
