Opozita organizoi protestën e radhës, pikërisht ditën kur parlamenti kishte seancë plenare, duke u pozicionuar para godinës ligjvënëse.
Panorama e zhvillimit të saj që afërsisht po ajo e protestave paraardhëse, ku herëpashere kishte fërkime të turmës me policinë në përpjekje për të çarë kordonin e kësaj të fundit, hedhje shashkash e tymuesesh nga turma, por pa kësaj here pa kundërpërgjigje me gaz lotsjellës. Kjo, edhe nga panevoja e përdorimit, pasi për asnjë çast nuk pati rrezik të cenimit të institucionit ligjvënës – parlamentit.
Në sfond, opozita përdori sërish kolonën zanore të filmit “Skënderbeu”, një lloj uverture me nota të forta heroike e nacionale bashkë, duke e pozicionuar Ramën në kahjen e armikut. Megjithatë, në fjalën e tij kreu demokrat Basha zgjodhi Maduron e Venezuelës e jo ndonjë turk, për ta krahasuar rivalin e tij politik.
“Çdo kush ka ardhur me vendosmëri për t’i dhënë fund regjimit mafioz të Ramës, dhe për ta përcjellë Maduron e Ballkanit para drejtësisë ose në azil politik. Sot në këtë shesh nuk janë bashkuar vetëm hallet, por edhe zgjidhja për shpresën që po vjen”, tha Basha.
Më tej, ai lëshoi këtë thirrje, me nota të theksuara lufte: “Edi Rama thirri mendjen se i ke orët e numërura dhe kërcënimeve do të të përgjigjen sy për sy e dhëmb për dhëmb. Nuk trembemi. Liri a vdekje, Demokraci a vdekje. Ora e hakmarrjes popullore po afron!”
Nga ana tjetër, partnerja e tij politike, znj. Kryemadhi, përmendi dhe frazën “thyerje turinjsh” për të parin e qeverisë.
“Shqiptarët ngrihen ngrihen fort dhe të thyejnë turinjtë kur i do qejfi. Rama është kryeministri më dështak, dhe që i ka bërë më keq gjithë shqiptarëve në këto vite. Sot ne jemi një pjesë por mendoni që janë qindra dhe mijëra të tjerë në gjithë Shqipërinë që na përkrahin dhe që janë kundër politikave diskriminuese të Edi Ramës”, theksoi gruaja që drejton LSI-në. /tesheshi.com/
