Presidenti Hashim Thaçi, për dallim nga Parisi e Londra nuk është pritur edhe aq mirë në vizitën e tij në kryeqytetin austriak, Vjenë. Ndaj tij u reagua me parulla dhe u quajt terrorist në ditën e promovimit të librit biografik “New State, Modern Statesman”, të shkruar nga dy gazetarët britanik Roger Boyes dhe Suzy Jagger.
Gazeta austriake “Unsere Zeitung”, ka shkruar sot një artikull me titull “Protestë kundër presidentit kosovar Hashim Thaçi në Vjenë”.
Në Akademinë Diplomatike të Vjenës ku presidenti Thaçi promovoi librin e tij, ai u kritikua me disa parulla në duar nga David Stockinger, anëtar i bordit “Iniciativa për një Austri të Lirë”, së bashku me disa aktivistë tjerë.
Në parulla të tyre ishte fytyra e Tony Blair dhe Hashim Thaçi me mbi shkrimin se NATO ka financuar një organizatë terroriste, duke ju referuar UÇK-së, shkruan Insajderi.
Stockinger, gjatë marrjes së fjalës ka thënë sesi Ministria e Punëve të Jashtme e Austrisë mund të bëjë këtë skandal duke e lejuar një ngjarje të tillë propagandistike.
“Më të vërtetë kjo është një skandal që një institucion si Ministria e Jashtme austriake ka lejuar një ngjarje të tillë, propagandistike. Këtu është një ish-terroristë, i cili dyshohet për një numër veprash kriminale”, ka deklaruar Stockinger.
Tutje ai ka shtuar se UÇK-ja ishte mjet i NATO-së për të destabilizuar vendin.
Fotografia e presidentit Thaçi dhe Tony Blair u mbajt deri në përfundim të fjalimit të Stocikinger. Ndërsa pas aksionit, protestuesit dolën nga salla. /tesheshi.com/
