Shpërndarja e refugjatëve dhe emigrantëve anekënd vendit ndërsa qeveria po e mbyll “xhunglën” në Calais i ka nxjerrë banorët në protesta në qyteza të ndryshme të Francës.
Në juglindje të vendit, në Pierrefeu, u protestua ndaj propozimit të qeverisë për t’u bërë vend refugjatëve dhe emigrantëve në një hapësirë të braktisur pranë një spitali psikiatrik. Aktivistët e majtë po ashtu dolën në rrugë në të njëjtën qendër të banuar, por në mbështetje të refugjatëve.
Një protestë të tillë do të mbajë dhe Fronti Nacional, që po i nxit kryebashkiakët të mos e pranojnë planin për risistemimin e refugjatëve që gjenden në kampin në Calais. Fronti Nacional po organizon protesta të tilla në rajone të ndryshme të Francës.
Në Forges-les-Bains, në jug të kryeqytetit francez, u protestua gjithashtu sot ndaj arritjes së 40 emigrantëve afganë, të sjellë nga kampi në Calais e të strehuar në një ndërtesë në qendrën e banuar.
Presidenti francez, Francois Hollande, është zotuar ta mbyllë kampin në Calais para ardhjes së dimrit, e t’i risistemojë rreth 9.000 refugjatë në 164 vende anembanë Francës. /tesheshi.com/
