Presidenti Meta firmosi në shesh dekretin kundër ligjit që i hoqi atij kompetencën për betimin e gjyqtarëve të rinj kushtetues dhe paralajmëroi se do shpërndajë parlamentin më 15 mars.
Ishte ky epilogu një fjalë mbajtjeje gati njëorëshe, mbushur me akuza, në fillim për ndërkobëtarët, që sipas tij janë një bandë që po i rrëmbejnë sovranitetin Shqipërisë, e vijuar me akuza të llojllojshme ndaj mazhorancës.
“Jam i lumtur se Kushtetuta e popullit ka sot në këtë shesh popullin e kushtetutës. Përpara se të firmos dekretin kundër ligjit antikushtetues për betimin e anëtarëve të Gjykatës Kushtetuese. Kush është pro ju lutem të ngre dorën.
Rroftë Republika, rroftë shteti i republikës. Këtu ka një kërkesë tjetër, nuk kënaqen me kaq. Duan që sot shpërndarjen e parlamentit puçist. Më duhet të firmos këtë dekret dhe do të kthehem përsëri këtu për atë dekretin tjetër që e brohoritët me shumë se ky”, tha Meta.
Ndërkohë, reagimi i parë pas përfundimit të protestës, ishte ai i ambasadores amerikane, e cila shkroi:
“U befasova kur pashë flamurin amerikan në ‘manifestimin’ e sotëm. Për të shmangur çdo konfuzion, dëshirojmë të sqarojmë se ndërsa SHBA mbështesin të drejtën e protestës paqësore, ne nuk kemi asnjë lidhje me ‘manifestimin’ të sotëm”, shkroi Kim, në një formimfjali të koduar, e cila pasoi shfaqjen e Metës me flamurin amerikan, duke deklaruar:
“Unë nuk e kam Amerikën të parën, të parën gjithmonë do të kem Shqipërinë.
Por Amerikën e kam të dytën dhe jam gati për hir të asaj që Amerika ka bërë për ne, për shqiptarët kudo, të bëj çdo gjë për Amerikën që nuk dëmton Shqipërinë dhe shqiptarët.
Këtë flamur e mora pasi kanë ardhur me dhjetar dhe me qindra shqiptar nga Amerika. Kanë lënë punët e tyre. Këtë flamur e ngrita në respekt të gjithë miqve tanë të mëdhenj në Amerikë.
Ta kalojmë tek betimi, për betimin duhet flamuri i Shqipërisë, flamuri Kuq e zi”, ishin fjalët e Metës. /tesheshi.com/
