Protesta e kopshtit zoologjik të Los Angeles-it jashtë pallatit presidencial të Kilit bëri bujë dje të premten. Protestuesit mbanin kufomën e një luani, duke fajësuar një shërbim publik për vdekjen e kafshës.
Pas kufomës së Zeusit, një luani 14-vjeçar, rojet e kopshtit zoologjik mbanin pankarta ku shkruhej “Qeveria vret kafshët”, ndërsa kalimtarët e habitur kapën protestën në celularët e tyre.
Menaxhmenti i kopshtit zoologjik akuzon Shërbimin e Bujqësisë dhe Blegtorisë (SAG) se i detyron kafshët e egra të drogohen për të lexuar mikroçipet e tyre.
“SAG na ka kërkuar që të imobilizojmë dhe anestezojmë të gjitha kafshët tona për leximin e mikroçipeve të tyre,” tha Cesar Canaba, këshilltar ligjor për kopshtin zoologjik të Los Angeles, që ndodhet rreth 470 kilometra në jug të kryeqytetit Santiago. “Ne u shpjeguam se anestezia mbart të njëjtat rreziqe për kafshët si për njerëzit”, shtoi ai dhe pohoi: “Na detyruan të fusim duart në gjak”.
Në një komunikatë nga SAG, theksohet se anestezia është procedurë rutinë dhe se masa është vendosur për sigurinë e kafshëve dhe të personelit. “Fatkeqësisht, një nga kafshët që iu nënshtrua kësaj procedure ka ngordhur”, thuhet në deklaratë. Ai dënoi mënyrën se si menaxhmenti i kopshtit zoologjik kishte zgjedhur këtë protestë të veçantë, duke lënë të hapur mundësinë e veprimeve ligjore ndaj saj.
Policia rrethoi me shpejtësi zonën përreth pallatit presidencial dhe hoqi kufomën e luanit. /tesheshi.com/
