Mijëra protestues kanë vërshuar të dielën në rrugët e qyteteve braziliane për të kërkuar vënien nën akuzë të presidentes Dilma Rousseff, duke bërë thirrje dhe për ndërhyrje ushtarake për ta larguar atë forcërisht nga posti.
Protesta më e madhe ka qenë në San Paulo, një fortesë e opozitës, ku një milionë njerëz kanë ngritur zërin kundër Dilma Rousseff-it, mes pakënaqësisë në rritje, një ekonomie të lëkundur, e një skandali të madh korrupsioni me Petrobras-in, gjigandin shtetëror të naftës.
Të veshur me ngjyrat e flamurit brazilian, protestuesit kërkuan fajësimin e presidentes, e cila sapo ka nisur mandatin e saj të dytë, e rizgjedhur në post në fund të vitit 2014. Një numër prej tyre kërkuan dhe ndërhyrje ushtarake për t’u dhënë fund 12 viteve në pushtet të Partisë së Punëtorëve.
Dhjetëra figura politike, duke përfshirë dhe aleatë të ngushtë të Dilma Rousseff-it, janë në hetim për ryshfet dhe pastrim parash në prodhuesin e naftës në pronësi të shtetit, teksa prokurorët e kanë cilësuar si skemën më të madhe korruptive të zbuluar ndonjëherë në Brazil.
Asnjë nuk është dënuar ende, por ca prej veprimeve të jashtëligjshme të pretenduara kanë ngjarë ndërsa presidentja aktuale e Brazilit ka qenë drejtuese e bordit të Petrobras-it. /tesheshi.com/
