Protesta para parlamentit e banorë të “Astirit” ka degjeneruar në përplasje të dhunshme të turmës me forcat policore, ku siç raportohet zyrtarisht, rasti me flagrant është ai i këputjes së gishtave të një prej efektivëve policor femër. Ndërkohë, edhe kolegë të tjerë të saj përfunduan në spital me lëndime e plagosje, ç’ka detyroi vetë ministrin Lleshaj që të vizitonte në spital, për të dhënë më pas këtë mesazh”
“Janë një numër i konsiderueshëm policësh të dëmtuar që pa asnjë arsye paguajnë një çmim të pamerituar. Thirrje qytetarëve që të kuptojnë mirë që policia është e tyre, mban simbolet e kombit, kush vë dorë ndaj saj ngre dorë ndaj interesit të madh publik. Thirrje përfaqësuesve politikë që të distancohen nga dhuna dhe aktet e papërgjegjshme dhe të vihen në mbështetje të policisë që është e jona, e shtetit shqiptar. Thirrje qytetarëve që të kuptojnë se qeveria dhe institucionet janë të angazhuara për të plotësuar detyrimet përballë cdo individi, dhe ata që preken nga projekti i Unazës së Re në bazë të ligjit. Ata që kanë guxuar të përballen me policinë duhet të kuptojnë me maturi se përgjegjshmëria e policisë nuk duhet kuptuar për dobësi të saj, toleranca edhe e tepruar e policisë ndaj dhunës nuk është akt dobësie dhe nuk ka për t’u toleruar”, u shpreh kreu i Rendit.
Ka reaguar gjithashtu dhe kryeministri Rama, duke u shprehur:
“Dhuna ndaj policëve në emër të paligjshmërisë, s’do tolerohet! U bëj thirrje atyre që kanë dokumente prone a vetëm strehën pa leje: Distancohuni nga zaptuesit profesionistë dhe profesionistët e politikës qorre të shpifjeve e të rrëmujës! Merrni ç’ju jep ligji e largohuni nga rruga”.
Në reagimin e dhunshëm të protestuesve ndaj policisë, kanë qenë të pranishëm dhe eksponentë të opozitës. Këta të fundit kanë preferuar që të vizitojnë në spital protestues të lënduar.
E gjitha ndodhi teksa në foltoren e parlamentit, kryeminstri Edi Rama denonconte ata që i konsideron zaptues pronash, e që tani duan dëmshpërblim 100 përqind. /tesheshi.com/
