Dy ditë para protestës së paralajmëruar të opozitës, e cila ka përcjellë sërish thirrje për fundin e Ramës, Ambasada Amerikane në Tiranë ka lëshuar apelin e radhës për mosushtrim dhune.
“E drejta për t’u përfshirë në protesta paqësore është një e drejtë themelore demokratike. Përgjatë muajve të fundit, pjesa më e madhe e pjesëmarrësve kanë ushtruar të drejtën e tyre për të protestuar paqësisht. Megjithatë, në çastin kur një protestë paqësore njolloset nga një akt dhune, qoftë edhe nga një individ, qëllimi demokratik i protestës kompromentohet. Është e paligjshme dhe jo demokratike të kryesh akte dhune, përfshirë edhe shkatërrimin e pronës. Iu bëjmë thirrje të gjithë personave të përfshirë në protestën e së shtunës që të refuzojnë dhunën për të siguruar një protestë paqësore dhe konstruktive”, thuhet në një mesazh nga selia përfaqsuese e Uashingtonit në kryeqytetinn shqiptar.
Paralel me këtë zhvillim, e Ngarkuara me Punë e Ambasadës, ndryshe zv/ambasadorja Leyla Moses-Ones, realizoi këtë të premte një takim me deputeten demokrate Rudina Hajdari. Kjo e fundit, e cila nuk pranoi të digjte mandatin, po mbështetet fort nga ndërkombëtarët në misionin e saj të ri politik, si një prej emrave kyesorë përfaqsuese të së ashtuquajturës “opozitë e re” në parlament. /tesheshi.com/
