Ministria e Rendit është ndjerë e relaksuar pas përfundimit të protestës së opozitës, ku siç saktëson ajo nuk u shënua asnjë incident. Ndaj dhe ka shpërthyer në falenderime, duke përfshirë në to edhe vetë njerëzit që dolën në protestë.
“Në përfundim të protestës, Ministria e Punëve të Brendshme dëshiron të falënderojë përzemërsisht të gjithë qytetarët e Tiranës dhe qyteteve të tjera të Shqipërisë për mirëkuptimin, durimin e dëshmuar dhe mbështetjen e dhënë ndaj forcave të Policisë së Shtetit, pavarësisht vështirësive që mund të kenë hasur gjatë bllokimit të disa akseve rrugore”, thuhet në një deklarëtë të dikasterit të Rendit gjatë orëve të mbrëmjes.
Po ashtu, jepen dhe disa të dhëna mbi numrin e automjeteve të ardhura nga rrethet nën siglën e PD-së.
“Policia menaxhoi me shumë profesionalizëm dhe korrektesë të gjithë lëvizjen në akset rrugore dhe parkimin në Tiranë të rreth 60 autobusëve, 80 mikrobusëve/fugonave dhe rreth 700 autoveturave të ardhura për tubimin e organizuar nga PD dhe partitë e saj aleate nga të 12 qarqet e Shqipërisë, përfshirë këtu edhe nga njësitë administrative të Tiranës”.
Protesta e opozitës këtë të shtunë pritej me njëfarë ankthi, kjo pas gjuhës së ashpër të lidershpit të opozitës brenda çadrës; por që siç u pa, gjithçka rrodhi e qetë dhe vërtet pa më të voglin incident. /tesheshi.com/
