KFOR-i në Kosovës ka paralajmëruar se mund të reagojë forcërisht gjatë protestës së pritshme kundër Demarkacionit me Malin e Zi që pritet të mbahet me datë 1 shtator, ditën pra kur është planifikuar ratifikimi i marrëveshjes për përcaktimin e vijës kufitare me shtetin fqinj.
Gjeneral/Major Guglielmo Luigi Miglietta, gjatë një ceremonie në kuadër të ndërrimit të komandës, e paralajmëroi një gjë të tillë, duke thënë se KFOR-i është reaguesi i tretë pas Policisë së Kosovës dhe asaj të EULEX-it.
“KFOR-i është i gatshëm të reagojë nëse është e nevojshme”, tha ushtaraku i lartë, ku më pari i bëri një rezyme situatës së sigurisë në Kosovë, duke e konsideruar atë si të brishtë.
Për këtë, ai përmendi protestën e djeshme në fshatin Mushisht ku banorët shqiptarë nuk i lanë ata serbë që të riktheheshin aty për një kremtim pa kërkuar me parë falje për krimet e bëra vite më parë; sulmet e fundit ndaj Kuvendit të Kosovës dhe RTK-së, si dhe sulmin e fundit ndaj shtëpisë së drejtorit të televizionit publik, Mentor Shala, të cilat i dënoi si akte.
Sa për Demarkacionin, Luigi Miglietta tha se është çështje e brendshme e Kosovës, e se në mars të këtij viti, me kërkesën e ish-presidentes së vendit, Atifete Jahjaga, KFOR-i ka ofruar hartat e kufijve të Kosovës. /tesheshi.com/
