Ndërsa vizitojnë çadrën ku qëndrojnë aktivistë të opozitës, në ditëne dytë të protestës, figura të ndryshme të partisë Demokratike dhe deputetë të saj kanë folur për disa skenarë. Një prej tyre u artikulua nga deputeti Luçiano Boçi, sipas të cilit zgjedhjet mund të shtyhen edhe në vjeshtë.
I pranishëm në shesh mes aktivistëve, Boçi përsëriti kërkesën e PD për krijimin e një qeverie teknike për të garantuar zgjedhje të lira dhe të ndershme.
“Qëndresa do vazhdojë, ne i kemi parashtruar kërkesat tona, qeveri teknike dhe sigurimi i zgjedhjeve të lira dhe të ndershme. PD nuk po kërkon pushtet, ose fitore në tavolinë, por kërkon që qytetari mos cënohet me vullnetin e tij, vullnet që ka qenë i deformuar. Me kriminelë në politikë nuk mund të hyhet në një proces zgjedhor”, theksoi deputeti, sipas të cilit nuk ka asgjë të keqe që zgjedhjet të shtyhen edhe në vjeshtë. Madje, ai ka përmendur edhe shtatorin si një muaj të përshtatshëm për zgjedhje.
“Nëse gjykohet në tërësi ne e pranojmë shtyrjen e kohës”, tha Boçi. /tesheshi.com/
