Protesta e opozitës në Tiranë, e përfaqsuar tashmë nga një çadër gjigande para kryeministrisë, ka hyrë në ditën e tretë të saj. Ajo startoi të shtunën, kur pas pak fjalimeve në podium, ku më kryesori qe ai i kreut demokrat Basha, u ngrit menjëherë një çadër ku prej afro 72 orësh qëndrojnë brenda saj krerë të opozitës e përkrahës të saj. Prej aty përcillen qëndrime e deklarata në lidhje me kërkesën bazë që është largimi i Ramës nga qeveria, krjimi më pas një qeverie teknike, si kusht këto për zgjedhje të lira e të ndershme; pra fiks ajo që u paralajmërua ditë më parë nga deputeti i PD-së, Aldo Bumçi, skenari maqedonas.
Reagimi i parë nga qeveria ishte të dielën në mbrëmje, ku kryeministri Rama, fjalimin e tij javor ia kushtoi pikërisht protestës së opozitës. Ai tha se e respektonte atë dhe të gjitha ata që ishin kundër qeverisë së tij, porse reformat, e sidomos ajo në Drejtësi, së bashku me proçesin e vettingut, duhet të vazhdojnë dhe do të vazhdojnë.
Shefi i qeverisë u përpoq të çarmatoste kauzën e opozitës duke thënë se pretendimet e saj për zgjedhje të cenuara nuk bazohen në asnjë raport ndërkombëtar, në asnjë fakt apo argument; dhe se e gjitha kjo që po ndodh ka për qëllim bllokimin e vettingut.
Ndërsa aleati i tij, Meta ende nuk ka reaguar. Nga çadra e opozitës, kreut të LSI-së i është bërë thirrje që të shkëputet nga Rama dhe të bashkohet me të, por asnjë reagim, vetëm heshtje. Heshtje ka patur dhe nga ndërkombëtarët në lidhje me protestën e opozitës, llojin e saj dhe kërkesat. As ambasada amerikane apo Zyra e BE-së, të cilat këto kohë kanë qenë të angazhuara maksimalisht me zhvillimet në politikën shqiptare që kanë në qendër reformën në Drejtësi, nuk kanë dhënë ndonjë deklaratë apo shprehur ndonjë qëndrim.
Kë këtë atmosferë, në Tiranë pritet të mbërrijë eurodeputeti Kurt Fleckenstein, pikërisht për çështjen e ecurisë së vettingut, por që pritet të jetë i pari ndërkombëtar që do shprehet në lidhje me protestën e opozitës.
Kjo e fundit është përbetuar se nuk do lëvizë nga bulevardi pa ikur Rama, dhe se për gjithçka vendimin e merr populli.
Ndërkohë, risi e djeshme në protestë ka qenë prania e atyshme e dy figurave të njohura të gazetarisë shqiptare, Armand Shkullaku dhe Sonila Meço, të cilët kanë përcjellë mesazhi anti-qeveritare dhe pro-opozitare. /tesheshi.com/
