Presidenti Meta, në rolin e një njeriu “mes palëve”, si kreu i shtetit, ka apeluar që opozita të mos ushtrojë akte dhune gjatë protestës të së shtunës në mbrëmje.
Pos kësaj, në thirrjen e tij, njeriu që është njëherësh bashkëshort i gruas në krye të LSI-së, Monika Kryemadhi, e quan të drejtë kauzën e opozitës.
“Në protestat e mëparshme, pavarësisht nga përkrahja qytetare, janë vërejtur disa akte dhune të papranueshme, ndaj dua t’ju kujtoj se drejtësia e kauzës tuaj nuk duhet të cënohet nga veprime të papërmbajtura të individëve të caktuar”, shprehet Meta. Por siç mund të vihet re, në mesazhin e presidentit edhe dhuna pranohet se ka ndodhur, ndryshe nga mbrojtja që opozita PD-LSI i bën vetes duke e mohuar atë.
Sipas Metës, është mirë që shqiptarët – duke ia atribuuar pra shqiptarëve protestat e militancave të dy partive – bëjnë mirë që protestojnë.
“Si President i Republikës kam qenë dhe jam i bindur se është më mirë që shqiptarët të protestojnë për të drejtat e tyre dhe të kërkojnë një Shqipëri më të mirë dhe gjithëpërfshirëse, se sa të largohen nga vendi”, shprehet kreu i shtetit. /tesheshi.com/
