Protesta e sërishme e opozitës mbrëmjen e kësaj të hëne, ka patur të tjera imazhe të trazuara, ndonëse të reduktuara vetëm në tym. Pak para zhvillimit të saj, ndërkombëtarët bombarduan me deklarata të ashpra kundër dhunës, ku veçoi qëndrimi amerikan që e nominoi me emër e mbiemër dyshen e opozitës Basha e Kryemadhi.
Protesta nisi para kryeministrisë, ku si pasojë e shiut, një lum çadrash u shfaq në boulevard me mbishkrimin “Ik”, referuar kryeministrit Rama. aty nisën të hidhen tymuese dhe nën tym, Basha dha mesazhet e njohura tashmë, një kombinim mes akuzës dhe kauzës.
“Me dhunë i mori zgjedhjet, ky është parlament ilegjitim, kryeministër ilegjitim. Dy vjet prokuroria ka vetëm në mision, të ndalë hetimin e dosjeve kriminale ku pala e Edi Ramës dhe kupola e mafies vodhën votën, liritë për të diktuar me votë, pa të cilën nuk ka mirëqenie.
Ne refuzojmë dhunën e qeverisë së ardhur me dhunë, ne do t’i përgjigjemi me bashkimin e shpirtrave tanë, me fuqinë e pjesëmarrjes, vendosmërisë. Dhuna shtetërore është produkt i dhunës zgjedhore. Ne nuk jemi këtu për karrige, për mandate, ato dogjëm sepse jemi në krahët e qytetarëve., kundër dhunës, kundër krimit.
Ka vetëm një rrugë se si do të mbarojë kjo rrugë: Ne duhet dhe do ta fitojmë betejën për zgjedhje të lira, për qytetarët me qytetarët, Rama ik! Rruga e Evropës mbetet e bllokuar sepse nuk shkohet në Evropë me zgjedhje të vjedhura”, u shpreh kreu demokrat.
Më pas, nën drejtimin e Bashës, marshimi protestues vijoi në disa institucione të shtetit. /tesheshi.com/
