“Komuniteti Himariot”, një klub politiko-social, ka paralajmëruar për nesër një protestë të madhe në Himarë. Kryetari i këtij organizmi është biznesmeni Nikollaq Neranxi, ish-deputeti i Partisë Agrare më pas i LSI-së së Ilir Metës, që sot kryeson lobin që është vënë kundër drejtimit aktual të Himarës.
Në protestën që është fryrë shumë këtë javë nëpër organet me medias, pritet të vijë edhe Nikolas Gejxh, shkrimtari dhe drejtuesi i një prej organizatave më anti-shqiptare me qendër në SHBA.
Po ç’kërkon “Komuniteti Himariot” në protestën e nesërme?!
Neranxi ka folur shumë gjatë këtyre ditëve; ka akuzuar pushtetin se po merr pronat, po konfiskon, ndaj dhe ka kërkuar mobilizim.
Në rrjetet sociale ka shumë helm nga banorët e zonës së Himarës, të cilët replikojnë me tyre akuza e kundër-akuza.
Dhe për fat të keq, për turpin e tyre fusin si pjesë të këtyre akuzave dhe prapaskenave edhe muslimanët.
Vetëm një fshat i Bregut është tërësisht musliman, ai është Borshi. Fshati që nuk ka asnjë konflikt pronash, asnjë problem social, asnjë përplasje mes vetes. Qytetarët e Borshit janë persekutuar në kulm nga komunizmi pasi kanë qenë pjesë e elitave publicistike dhe intelektuale të kohës.
Me akuza të tmerrshme për “osmanë dhe turq”, i famshmi komunitet himariot ka sjellë në skenë një klimë ndarjeje dhe përplasjesh.
Protesta e thirrur për nesër kundërshton projektin urbanistik për qendrën e Himarës e cila arrin shumën e 3.5 milionë eurove dhe ndryshon totalisht formën e qytetit: nga fshat-qytezë në qendër turistike.
Projekti i rregullimit të qendrës së Himarës do të prekë gjashtë objekte si dhe toka të cilët “komuniteti” e kundërshton.
Protestuesit kanë deklaruar se nuk kanë informacion për projektin.
Kryetari i Bashkisë së Himarës, Gjergji Goro, deklaroi se “Ky projekt i zhvillimit të qendrës së Himarës është një projekt i cili duhet të bëhet për 500-600 familje të tjera, që ata të jetojnë më mirë, dhe mundësi zhvillimi. Po ashtu, dhe biznesi në qendër të Himarës do të dyfishohet duke krijuar mundësinë të jetojnë më mirë. Prishjet që do bëhen janë gardhe dhe mure rrethues që janë ngritur në vite dhe me bërjen e këtij projekti për zhvillimin e qendrës së Himarës do të ketë më shumë rrugë, parkime, kënde lojërash për fëmijët”.
Sipas Goros, nga ky projekt do të preken 6 familje, por zhurma bëhet nga të tjerë që kanë ambicie për të tjera gjëra.
“Komuniteti Himariot”
Protesta e nesërme e thirrur nga “Komuniteti Himariot” nuk bëhet vetëm për problemin e planit por në një protestë publike aty flitet edhe për çështje “etnike”.
Ç’hyn etnia këtu kur në Himarë zyrtarisht nuk ka minoritet grek?!
Në faqen e internetit të komunitetit është botuar një fotografi me logo e organizatës e shkruar edhe në shqip edhe në greqisht. Aty ndodhen të gjithë anëtarët e “kupolës himariote”
Në krye është Nikollaq Neranxi dhe më pas gazetarët Ilir Paço, Plator Nesturi dhe Stavri Marko. Anëtari tjetër është mjeku Elton Bollano që pasohet nga juristi Arjan Dhrami dhe muzikanti Edmond Doko.
Në një deklaratë të këtij grupimi, e para fare nga konstituimi theksohet: “na duhet të përrisim se veç problemit të pronave mes qeverisë shqiptare dhe qytetarëve himariotë të cilët nuk janë vetëm qytetarë shqiptarë, por amerikanë dhe europianë, të cilët nuk përfaqësojnë domosdoshmërisht linjën dhe mendimet e eutoritetet vendore dhe politike të qeverisë, kanë lindur kontradikta thellësisht konfliktuale, etnike dhe politike për të cilën askush nuk mund të dijë shkallën e rrezikut dhe stabilitetin në të ardhmen, kjo për faktin se nuk jepet asnjë lajm dhe nuk informohet opinion publik i shëndoshë shqiptar”.
Pra në mënyrë të prerë paralajmërohen autoritetet për kontradikta etnike dhe prishje të stabilitetit në Himarë.
Po nga kush?!
Kjo nuk thuhet por është as më pak e as më shumë por precedent grek i Mitrovicës që kërkohet të krijohet në jug me pretekstin e “beslidhjes së 7 fshatrave të Himarës”.
Po Borshi?! Po Vunoi, Piluri, po Lumi i Vlorës që është pjesë e bashkisë së re të Himarës?!
Kreu i “Komunitetit Himariot”, Nikollaq Neranxi ka dhjetra shkrime kur ishte deputet që mbronte tezën e Himarës-Labëri të pandarë nga krahina që ka një entitet të përbashkët në rite dhe folklor, pavarësisht besimit të ndryshëm fetar.
Çdo të ndodhë nesër?!
Padyshim që do të firmoset ndonjë peticion në dy gjuhë, por është në detyrën e Neranxit të shpjegojë ç’punë ka Gejxh dhe grupimet panhelenike?!
Deri tani nuk është prononcuar kreu i PBDNJ-së, Vangjel Dule por edhe organizata OMONIA. Do të ishte i rëndësishëm qëndrimi i tyre. /tesheshi.com/
