Ka marrë një dimension politik protesta e maturantëve te Ministria e Arsimit, të cilët janë kundër testeve që për ta janë ndryshuar në funksion të vështirësimit.
Ministrja Besa Shahini reagoi duke thënë se nuk është ajo që harton testet.
“Provimet Kombëtare hartohen nga ekspertë provimesh. Unë i besoj Qendrës së Shërbimeve Arsimore (QSHA) kur thotë se sivjet provimet janë më të lehta se kurdoherë më parë sepse ndodhin pas një gjendjeje të jashtëzakonshme dhe prandaj janë konceptuar vetëm me alternativa – PA TEMAT që janë zhvilluar në kushte shtëpie. Dhe kjo, vërtetohet lehtësisht në fund, kur të mblidhen të gjitha rezultatet dhe nëse rastis që testi të ketë qenë më i vështirë se sa njohuritë e nxënësve, atëherë qsha bën rishpërndarje të peshës së pikëve për çdo notë. Por, këto çështje teknike s’kanë as lidhje e as vend për debate politike dhe jo më për protesta opozitare”, u shpreh Shahini.
Po cilat janë implikimet politike në protestë? Aty janë shfaqur eksponentë të PD-së, e po ashtu dhe nga Aleanca për Teatrin
“Fatkeqësisht, nxitësit janë publikisht të afishuar dhe nuk janë zëdhënës opinionesh dosido. Ata janë opozita politike e vendit! Që është një absurditet unik: opozita nxit dhe mbështet protestë kundër testeve kombëtare!!!
Opozita stimulon ‘lehtësimin’ e dhënies së notave për nxënësit!!!
Po mbase këtu s’ka asgjë të re, përderisa kjo opozitë ishte dje qeveria e notave fallco, diplomave fallco, universiteteve fallco, provimeve fallco, promovimeve fallco…”, tha në reagim ministrja e Arsimit. /tesheshi.com/
