Asociacioni i Gazetarëve të Kosovës protestoi sot para objektit të qeverisë me moton “Fol mos u tut”.
Protestës i janë bashkangjitur një numër i madh i gazetarëve nga të gjitha mediumet vendore .
Kryetari i AGK-së, Zekirja Shabani ka thënë se rritja e sulmeve dhe kërcënimeve ndaj gazetarëve është dëshmi e cenimit të fjalës së lirë në Kosovë.
“Faleminderit që i jeni përgjigjur ftesës së AGK-së për të dënuar presionin që po vjen e rritet në Kosovë. Rritja e sulmeve ndaj gazetarëve është dëshmi e cenimit të fjalës së lirë, ku situata sa po vjen e po bëhet edhe më shqetësuese, pasi edhe zyrtarë të lartë të shtetit marrin guximin dhe kërcënojnë gazetarët. Kështu veproi kryeministri i Kosovës, Isa Mustafa, i cili do të duhej të ishte garanci i ushtrimit të shprehjes së lirë”, ka thënë Shabani.
Kjo protestë është organizuar pas lajmit që doli se kryeministri i vendit, Isa Mustafa ka kërcënuar përmes telefonit gazetarin Vehbi Kajtazi i cili kishte publikuar lajmin për vëllain e kryeministrit që kishte kërkuar azil.
AGK ka kërkuar nga kryeministri Mustafa që të kërkojë falje publike dhe të sqarojë pozicion e tij ndaj akuzave të ngritura nga gazetari Kajtazi. /tesheshi.com/
