Fjalimi i kryedemokratit Basha në protestën e kësaj të marte para parlamentit, ka patur dhe nuanca klerikale. Duke iu referuar atyre që nuk pranuan të dorëzojnë mandatin – siç Myslim Murrizi – apo të atyre që pranuan të marrin atë – më së shumti nga LSI, Basha iu lut Zotit për mëshirë ndaj tyre.
Tradhtarët që kurrë nuk do t’i falë historia. Zoti pastë mëshirë për shpirtrat e tyre, se fytyrë ata nuk kanë më para shqiptarëve!”, u shpreh Basha.
Më tej, ai tha se ora e Ramës po mbarron: “Tik tak, tik tak, tik tak. Kjo është ora e bekuar e shpresës dhe besimit te vetja jonë që shqiptarët kanë ëndërruar. Për vite me radhë thundra e krimit, korrupsionit, perversitetit dhe mashtrimit me fytyrën dhe gojën e Ramës shkeli mbi dinjitetin e cdo shqiptari. Ora kur një njeri i vetëm me ndihmën e krimit po shtronte një popull të tërë, kjo orë ka mbaruar këtu ku buçet verdikti i popullit sovran ‘Rama ik’”, kumtoi kryedemokrati.
Duke iu drejtuar turmës, Basha tha se me djegien e mandateve u dëgjua pikërisht zëri i tyre.
“Për muaj edhe vite zëri juaj ka kërkuar herë me ndrojtje e herë me mllef, herë me mirëkuptim, herë me pikëpyetje, kur do t’i digjni mandatet. Zëri juaj është dëgjuar, 10 ditë më parë opozita ju përgjigj. Dhe unë kam sot nderin që në emrin e popullit sovran, të shpreh mirënjohje dhe të falenderoj ata qindra patriotë, kandidatë të listës vijuese që djegin sot mandatet e tyre para popullit sovran. Kjo është beteja për Shqipërinë e vlerave, për Shqipërinë europiane”, u shpreh lideri i opozitës joparlamentare. /tesheshi.com/
